O concello do Porriño, situado na área de influencia da cidade de Vigo, destaca polo seu forte carácter industrial; dentro do ámbito natural, merece unha reseña o lugar de interese comunitario (LIC) das Gándaras de Budiño; estes humidais albergan gran cantidade de especies faunísticas, que son de vital importancia para a conservación das mesmas.

Para manter este espazo e evitar incrementar a deterioración das augas fluviais é necesario dispoñer dun sistema de saneamento eficiente que cumpra os obxectivos da Directiva Marco da auga. A pesar da construción da E.D.A.R. de Guillarei, a maior parte da poboación do Porriño non dispoñía dun sistema de saneamento e os seus habitantes debían recorrer a sistemas de saneamento individuais. Existía unha rede de colectores que foron executados no seu momento pero non tiñan conexión co sistema xeral do Louro. Ante esta situación foi necesario e prioritario fronte a outras actuacións posibles conectar os saneamentos xa executados ao sistema xeral do Louro.

As accións que se executaron teñen por obxectivo recoller as augas residuais de redes existentes (que anteriormente se atopaban fóra de servizo) para conducilas ata os colectores do Louro e poder así realizar a súa entrega na E.D.A.R. de Guillarei situada no concello de Tui.