A actuación consistiu na execución dos seguintes traballos:

• Montaxe da estrutura lixeira que conforma o miradoiro
• Colocación de valos de protección na zona de paso de acceso ao miradoiro
• Colocación de mobiliario urbano
• Construción do miradoiro

Construción do miradoiro

A estrutura do miradoiro divídese en tres módulos: dous tramos de pasarela (1 e 2) que serven de acceso ao miradoiro e o miradoiro propiamente dito. Para mellorar o comportamento do conxunto, no contacto entre módulos déixase unha separación a xeito de xunta de 20 mm. para unha repartición de cargas óptima.

A xeometría do miradoiro está moi condicionada pola orografía do macizo granítico sobre o que se apoia, adaptándose en todo momento ao perfil do terreo.

As pasarelas teñen un ancho libre de 1,50 m. e unha lonxitude de 10,64 m. (tramo 1) e 14,34 m. (tramo 2). O miradoiro ten unhas dimensións de 6 m. de longo por 2 m. de ancho.

Para lograr unha adaptación á orografía do terreo, dispóñense catro tramos de escaleira con chanzos de 30 cm. de pegada (un primeiro tramo de cinco chanzos de suba, outro segundo de cinco chanzos de baixada e un terceiro e un cuarto de oito chanzos de suba cada un). Ademais colócanse catro plataformas horizontais como unión dos tramos de escaleira anteriores.

Sistema de ancoraxe ao macizo rochoso

A estrutura apóiase directamente na rocha mediante unha serie de piares de madeira de pequena altura.