A obra consistiu na construción dun sendeiro peonil autoguiado pola marxe esquerda do río Cerves dende a ponte Das mestas ata a aldea do Tourón, que supón unha lonxitude aproximada de 1.100 m., dando así mesmo continuidade ao existente realizado polo Concello de Melón.

O sendeiro combina catro seccións tipo:

• Acondicionamento da senda existente mediante roza, drenaxe e melloras puntuais do firme
• Construción dunha senda nova con ramplas e chanzos de 1,5 m de ancho con murete de cachotaría
• Construción dunha senda nova a media aba de 1,5 m de ancho con murete de cachotaría
• Construción dun sendeiro con escaleiras de madeira. Neste percorrido executáronse ademais dous miradoiros panorámicos e instalouse sinalización interpretativa, de regulación de accesos e de advertencia de perigo.

Mediante este sendeiro, accédese á terceira e cuarta fervenza e para cruzar á beira oposta construíuse unha pasarela peonil metálica co piso de Tramex, de 14,30 m. de luz e 1,50 m. de ancho.

Construíuse ademais un miradoiro con estrutura metálica e piso de Tramex de 20 m², situado a uns 40 m. augas abaixo da citada pasarela. Deste modo, preténdese facilitar un punto de observación seguro e atractivo que contribúe a reducir os movementos perigosos pola zona en combinación con sinalización de advertencia e peches de madeira.

Por último acondicionouse a pista forestal que accede dende a estrada de Tourón ata a fervenza. Este consistiu na drenaxe dos puntos máis conflitivos coa execución de cunetas e pasos de auga transversais, elimináronse as rochas e regularizouse con zahorra en firme nas súas zonas máis irregulares.