Quiroga visita as obras de saneamento e depuración executadas pola CHMS no municipio lucense de Sarria

Detalles

Xoves, 21 Novembro 2024

• Actuacións que supoñen un investimento de 3.322.500€ cofinanciadas polo Fondo Europeo de Desenvolvemento Rexional (FEDER), dentro do Programa Operativo Plurirregional de España (POPE)
• Mellorarase o servizo a 13.700 habitantes/equivalentes
• “É importante destacar, por tanto, a clara incidencia ambiental positiva destas obras, na medida en que contribúen a solucionar os problemas existentes, o que repercutirá directamente na calidade das augas do leito, evitando así a súa deterioración ambiental e paisaxística”, incidiu Quiroga

José Antonio Quiroga, presidente da CHMS, Organismo autónomo dependente do Ministerio para a Transición Ecolóxica e o Reto Demográfico, e o alcalde de Sarria, Claudio Garrido, visitaron as obras de mellora do saneamento e da EDAR do municipio lucense de Sarria, que acaban de rematar, actuacións executadas polo Estado e que supoñen un investimento de 3.322.500€

Os traballos iniciáronse o 7 de setembro de 2022 coa construción do colector interceptor no río Sarria e dun novo colector xeral sobre a traza do actual do colector interceptor xeneral de entrada á EDAR.

As obras estiveron suspendidas desde o 24 de maio de 2023 para a tramitación dun proxecto modificado consistente nunha actuación que desprace o punto de vertedura da EDAR, augas abaixo da illa da Veiguiña, ata a confluencia dos ríos Sarria e Celeiro.

O proxecto consistiu na construción dunha nova estrutura de regulación situada augas arriba da EDAR, que eliminan a sólidos da auga a tratar e da auga que en tempo húmido deba de ser aliviada porque exceda a capacidade de tratamento da EDAR. Como complemento a esta actuación construíuse un novo emisario que conduce a vertedura conxunta desta regulación e do caudal tratado pola EDAR a un punto situado a máis de 200 metros augas abaixo do punto de vertedura autorizada actual, co que se evita toda afección á illa da Veiguiña, de gran interese para os sarriáns.

“Estas actuacións contribuirán á resolución dun problema existente, mellorando a contorna do punto de vertedura da EDAR e o leito augas abaixo do mesmo, paliando os efectos negativos sufridos no río Sarria, unha masa de auga que cumpre cos obxectivos ambientais fixados na Directiva Marco da Auga, pero que estaba sometida á presión dunha vertedura puntual do núcleo de Sarria” incidiu Quiroga.

“É importante destacar, por tanto, a clara incidencia ambiental positiva destas obras, na medida en que contribúen a solucionar os problemas existentes,o que repercutirá directamente na calidade das augas do leito, evitando así a súa deterioración ambiental e paisaxística”.

“Por ultimo, é fundamental destacar o compromiso da Unión Europea co desenvolvemento sostible como obxectivo inspirador das políticas económicas e sociais" concluíu o presidente.

Descargar PDF