O presidente da CHMS visita aos alumnos do CEIP Flores de Sil durante as actividades de recoñecemento do río Meruelo en Molinaseca (León)

Detalles

Venres, 27 Outubro 2017

• O obxectivo do proxecto é potenciar o valor ambiental dos ríos da conca e concienciar, desde a infancia, sobre a importancia da protección e conservación dos ecosistemas fluviais
• Trátase dun proxecto piloto que se está desenvolvendo en Ponferrada, Ourense e Lugo e que se pretende dar continuidade en función dos resultados obtidos
• O presidente do organismo de conca estivo acompañado polo Delegado Territorial da Junta de Castilla y León e polo alcalde de Molinaseca

O Ministerio de Agricultura e Pesca, Alimentación e Medio Ambiente (MAPAMA), a través do Organismo autónomo Confederación Hidrográfica do Miño-Sil (CHMS), fomenta a Educación e a Sensibilización Ambiental da poboación, desde a infancia, potenciando o valor ambiental dos ríos da conca e concienciando sobre a importancia da protección e conservación dos ecosistemas fluviais.

Esta mañá o presidente do organismo de conca, Francisco Marín, acompañado polo Delegado Territorial da Junta de Castilla y León, Guillermo García, e o alcalde de Molinaseca, Alfonso Arias, visitaron o río Meruelo en Molinaseca (León), para comprobar o desenvolvemento das actividades que máis de 50 alumnos do CEIP Flores de Sil están a realizar no marco do proxecto "Gústame o meu río: ensíname a coidalo", promovido por este organismo de conca.

Proxecto
O proxecto está dirixido a escolares de educación primaria (10-12 anos), de centros escolares das cidades de Ponferrada, Lugo e Ourense, e ten como principal obxectivo que os alumnos comprendan que os recursos naturais como a auga e os ecosistemas que a sustentan son limitados e que debemos de asumir a responsabilidade e o papel do ser humano na conservación destes recursos.

Por outra banda, trátase de aproximar o río aos escolares a través de actividades que complementen a formación académica e de fomentar o contacto directo dos nenos coa contorna natural, aumentando os coñecementos sobre as diferentes especies de fauna e flora dos ecosistemas fluviais máis próximos ao seu lugar de residencia.

"A través destas actividades lembramos aos máis pequenos a necesidade de respecto, coidado, bo uso da auga, porque os pequenos xestos diarios son clave no aforro no consumo de auga e os escolares son a mellor ponte e medio transmisor de bos hábitos entre os seus familiares e amigos", concluíu o presidente.

Francisco Marín agradeceu a implicación da Junta de Castilla y León, a través da Dirección Provincial de Educación de León e do CEIP Flores de Sil tanto na predisposición para colaborar como na coordinación das distintas actividades que se realizarán ao longo deste curso escolar.

Descargar PDF