O último inverno foi o sétimo consecutivo máis cálido do normal

Detalles

Martes, 11 Marzo 2025

• Tratouse dun inverno moi cálido, cunha temperatura media de 7.8 ºC, valor 1.2 ºC superior ao do período 1991-2020. No seu transcurso non houbo ningunha onda de frío, algo que sucede por segundo inverno consecutivo.
• Dos dez últimos invernos, só un foi frío. O resto foron cálidos ou moi cálidos.
• Tratouse dun inverno seco no conxunto de España, aínda que con desigualdade na distribución: foi chuvioso no oeste peninsular e moi seco en amplas zonas do leste e Canarias.
• O máis probable é que a primavera astronómica sexa máis cálida do normal. En canto ás precipitacións, non hai unha tendencia clara.

A Axencia Estatal de Meteoroloxía (AEMET), dependente do Ministerio para a Transición Ecolóxica e o Reto Demográfico (MITECO), fixo público o seu resumo climático do inverno 2024-2025, que resultou moi cálido e seco no conxunto de España.

TEMPERATURAS

O inverno 2024-2025 - período comprendido entre o 1 de decembro de 2024 e o 28 de febreiro de 2025- foi moi cálido, cunha temperatura media sobre a España peninsular de 7,8 °C, valor que queda 1,2 °C por encima da media desta estación (período de referencia 1991-2020). Tratouse do sexto inverno máis cálido desde o comezo da serie en 1961 e do quinto máis cálido do século XXI.

Temperatura media, anomalía e carácter do inverno 2024-2025 en diferentes ámbitos xeográficos.

O inverno tivo un carácter cálido ou moi cálido en practicamente toda a España peninsular e en Baleares. En Canarias tivo un carácter variable dunhas zonas a outras, resultando en conxunto moi cálido. É destacable que se tratou do sétimo inverno consecutivo máis cálido do normal no conxunto de España. É a primeira vez que isto sucede en calquera estación do ano. Paralelamente, dos últimos dez invernos só un foi máis frío do normal: o de 2017-2018. Tres foron cálidos e seis moi cálidos.

Serie de anomalías da temperatura media do inverno na España peninsular desde 1961 (Período de referencia 1991-2020)

Decembro foi cálido, e tanto xaneiro como febreiro, moi cálidos. Aínda así, entre o 13 e 19 de xaneiro rexistráronse as temperaturas máis frías do inverno, con intensas xeadas nocturnas, aínda que con valores diúrnos ao redor do normal. Naquel episodio Molina de Aragón chegou a -11,2 ºC o día 14. Trátase do rexistro máis baixo de todo o inverno en estacións da rede principal.

Non houbo ningunha onda de frío, algo que sucede por segundo inverno consecutivo, e foron frecuentes os episodios cálidos para a época do ano. Destaca o do 9 ao 22 de febreiro. Con todo, a temperatura máis alta durante o inverno mediuse o 15 de decembro na Palma/aeroporto, con 28,8 ºC. Na Península, Murcia alcanzou 28,1 ºC o 27 de xaneiro.

PRECIPITACIÓNS

O inverno foi en conxunto seco, cun valor de precipitación media sobre España peninsular de 145,9 mm, valor que representa o 77 % do valor normal do trimestre no período de referencia 1991-2020. Tratouse do décimo sexto inverno máis seco desde o comezo da serie en 1961, e do sétimo do século XXI.

Precipitación acumulada, porcentaxe respecto ao valor normal e carácter do inverno 2024-2025 en diferentes ámbitos xeográficos.

O inverno comezou cun decembro moi seco (o segundo con menos choivas do século actual, tras o de 2015). Xaneiro comezou tamén seco en xeral, pero a segunda quincena foi moi chuviosa e o mes terminou con carácter húmido en conxunto. Febreiro foi un mes máis seco do normal, aínda que chuvioso en zonas da metade norte.

O inverno foi entre normal e húmido na metade oeste da Península, con excepción de puntos de Asturias, de Cantabria e de País Vasco onde mostrou carácter seco. En contraste, foi seco ou moi seco na metade oriental peninsular e en ambos os arquipélagos, chegando a ser extremadamente seco en pequenas zonas do sur de Cataluña, sur de Aragón e do suroeste de Castela-A Mancha.

Porcentaxe das precipitacións respecto á media normal do período 1991-2020 durante o inverno 2024-2025.

Houbo, por tanto, un predominio das borrascas atlánticas durante os períodos chuviosos. Mentres que zonas do oeste e noroeste peninsular rexistraron precipitacións entre o 125 e 150 % da media normal, en áreas do terzo oriental peninsular non se chegou nin ao 25 % do normal. O maior acumulado en 24 horas rexistrouse o 26 de xaneiro na Coruña/aeroporto, con 96,7 l/m². Ao longo dese mes rexistráronse 473 l/m² en Santiago de Compostela/aeroporto.

PREDICIÓN ESTACIONAL PARA A PRIMAVERA ASTRONÓMICA

A predición estacional para o trimestre abril-maio-xuño, aproximadamente coincidente coa primavera astronómica, mostra alta probabilidade de que as temperaturas estean por encima do normal en todo o país, especialmente en zonas costeiras da Península e nos arquipélagos. Con todo, non hai unha tendencia clara en canto ás precipitacións, e é tan probable que o trimestre sexa máis chuvioso do normal como que sexa máis seco en toda España.

Descargar PDF