A CHMS amplía o Sistema Automático de Calidade das Augas (SAICA) cunha estación no río Tamuxe no Rosal

Detalles

Xoves, 24 Outubro 2024

• nstalación cofinanciada a través do Proxecto Europeo POCTEP RISC_PLUS
• A demarcación hidrográfica do Miño-Sil conta con 116 estacións que facilitan información hidrolóxica (SAIH) e 19 delas están dotadas de tecnoloxía específica para achegar, ademais, datos de calidade das augas (SAICA)

A Confederación Hidrográfica do Miño-Sil (CHMS) finalizou a instalación dunha nova estación do Sistema Automático de Calidade das Augas (SAICA) no río Tamuxe, ao seu paso polo municipio pontevedrés do Rosal.

Os traballos consistiron na instalación dunha sonda multiparamétrica que fornecerá datos en tempo real de variables físico-químicas tan importantes para a calidade das augas como a turbidez, o osíxeno disolto, a condutividade, a concentración de amonio ou o ph, así como a temperatura da auga.

Este sistema permite detectar os episodios de contaminación accidental que se poidan producir nesta masa de auga e actuar de forma máis rápida e eficaz; así mesmo, poderase facer un mellor diagnóstico e control en continuo do estado da masa de auga del Río Tamuxe.

O envío dos datos desde a nova estación ata a súa recepción no centro de control de conca (CECU) da CHMS, situado na cidade de Ourense, levará a cabo vía satélite recibíndose un valor de cada variable cada quince minutos. Nestes momentos están a realizarse as probas e conexións necesarias para comprobar e asegurar o correcto funcionamento da transmisión de datos para a súa publicación na páxina web da CHMS nas próximas semanas.

Esta nova estación englóbase dentro do proxecto de ampliación da rede SAICA no marco do Proxecto RISC_PLUS, cuxo obxectivo é o deseño de medidas conxuntas orientadas á prevención, preparación, protección, predición e unha mellor xestión ante os fenómenos extremos, tales como inundacións e secas e fenómenos de contaminación accidental, así como avaliar e combater os efectos do cambio climático na demarcación internacional das concas dos ríos Miño, Sil e Limia.

As actuacións descritas supoñen un investimento de 41.105 € cofinanciados a través do Proxecto Europeo POCTEP RISC_PLUS.

Descargar PDF