Mais dun centenar de especialistas reúnense en Madrid para tratar a avaliación do estado e a calidade das masas de auga en Europa

Detalles

Xoves, 05 Outubro 2023

• Este grupo de traballo técnico enmárcase na Estratexia Común de Implementación da Directiva Marco da Auga

No marco da Presidencia española do Consello da Unión Europea (UE), España acolleu os días 3, 4 e 5 de outubro a reunión do grupo da Comisión Europea sobre estado e calidade da auga (WG ECOSTAT). Este grupo de traballo técnico enmárcase na Estratexia Común de Implementación da Directiva Marco da Auga para coordinar esforzos e axuntar criterios técnicos na aplicación da principal norma europea en materia de auga. A reunión celebrouse en Madrid na sede do Instituto Xeolóxico e Mineiro de España (IGME-CSIC).

O obxectivo principal do traballo deste grupo é a análise e a aplicación das técnicas para a mellora da avaliación do estado e a calidade das masas de auga en Europa.

O primeiro día do encontro realizouse un taller sobre ríos temporais no que se trataron temas como a contabilización dos caudais temporais e os desafíos que afrontan os plans hidrolóxicos. Tamén se presentaron varios proxectos de investigación nos que participan expertos españois, xunto con universidades, institutos de investigación e a administración da auga doutros países.

O segundo día centrouse na revisión dos últimos traballos do exercicio de intercalibración dos métodos de avaliación do estado das masas de auga, así como a actualización das normas CEN de estandarización; o informe sobre os avances do grupo de caudais ecolóxicos; unha exposición das conclusións do taller sobre ríos temporais celebrado o día anterior e a presentación de actividades do proxecto “Ríos libres de obstáculos”. Finalizou coa exposición dun estudo sobre o estado da recuperación da biodiversidade europea na auga.

Hoxe, durante o terceiro día do encontro, abordouse o uso dos elementos de calidade hidromorfolóxicos na avaliación do estado das masas de auga da categoría lagos; o uso dos RCE (ratios de calidade ecolóxica) dos elementos de calidade biolóxica na avaliación do estado das augas; e a revisión dos últimos traballos relacionados cos elementos de calidade fisicoquímicos que dan soporte á avaliación do estado ecolóxico.

Na reunión participaron máis de 150 representantes das administracións públicas da auga e medio ambiente de países da UE, así como especialistas de organizacións ambientais, sociais e económicas ligadas ao sector da auga.

Descargar PDF