A CHMS remite ao MITMA o informe sobre o estudo hidroxeolóxico clave para posibilitar a alta velocidade a Vigo

Detalles

Mércores, 28 Xuño 2023

• A ausencia deste trámite provocou a caducidade do expediente de EIA no ano 2017
• Informe encargado ao IGME con competencias en xeoloxía, hidroxeoloxía e ciencias xeoambientais
• O informe reflicte fielmente as peculiaridades do terreo en zonas do norte peninsular e destaca a viabilidade das actuacións descritas

A Confederación Hidrográfica do Miño-Sil (CHMS), organismo autónomo dependente do Ministerio para a Transición Ecolóxica e o Reto Demográfico, remitiu hoxe ao Ministerio de Transportes, Movilidade e Axenda Urbana (MITMA) o informe sobre o estudo hidrolóxico da variante de Cerdedo, que posibilitará a alta velocidade a Vigo.

“Este estudo é a clave para avanzar no proxecto de liña de Altas Prestacións a Galicia, do tramo Ourense- Vigo, neste sentido, a non achega do mesmo motivou, durante o ano 2017, a caducidade do expediente de Avaliación de Impacto Ambiental (EIA), neglixencia que supuxo un atraso inxustificado a soportar polo cidadán” resaltou José Antonio Quiroga, presidente do organismo de conca.

“A solicitude foi remitida pola Dirección Xeral de Planificación e Avaliación da Rede Ferroviaria a finais de xaneiro de 2023 e xa en febreiro esta CHMS rubricou o contrato de asistencia técnica para a análise da documentación co Instituto Xeolóxico e Mineiro, dependente do CSIC, atendendo á súa especialización en xeoloxía, hidroxeoloxía e ciencias xeoambientais” explicou Quiroga.

O resultado do informe reflicte fielmente as peculiaridades do terreo en zonas do norte peninsular e destaca a viabilidade das actuacións descritas, aínda que, incídese en que, á marxe das consideracións iniciais, durante a fase de execución dos túneles estableceranse exhaustivas medidas de seguimento e control para esta área considerada de influencia hidroxeolóxica.

“Neste sentido, hai que lembrar que a complexidade do proxecto e as características do terreo conlevan un importante grao de incerteza, ao non ser posible modelizar a execución ao 100%”, indicou o presidente

“Como resultado do informe destácase a viabilidade do proxecto, sen obviar que, aínda que non se prevén afeccións significativas a puntos singulares, recoméndase mellorar en puntos concretos a caracterización do medio físico, a través de sondaxes e modelos complementarios”, concluíu Quiroga.

Descargar PDF