No 2º ano máis seco da serie histórica, a adopción de medidas temperás permitiu que Bárcena se mantivese dentro da normalidade

Detalles

Luns, 24 Outubro 2022

• Grazas á colaboración dos regadores, que incluíron cortes nocturnos na Canle Baixa entre o 13 de maio e o 13 de xullo, garantíronse as demandas para os meses de agosto e setembro
• No regadío de Lemos a escaseza de reservas facía imposible satisfacer todas as demandas de rega, polo que se proporcionaron 3,73 Hm3 en toda a campaña, un 31,4% do que adoita ser habitual e, en colaboración cos regadores, deuse prioridade aos produtores profesionais

A Confederación Hidrográfica do Miño-Sil, Organismo autónomo dependente do Ministerio para a Transición Ecolóxica e o Reto Demográfico, reuniu á Comisión de Desembalse para facer balance do ano hidrolóxico 2021-2022, o 2º ano máis seco da serie histórica, por detrás do ano 2016/17.

A Comisión de Desembalse é o órgano colexiado ao que lle corresponde deliberar e formular propostas sobre o réxime adecuado de enchido e baleirado dos encoros e acuíferos, atendendo os dereitos concesionales dos distintos usuarios.

Bárcena

As achegas no total do período para a conca do Sil Superior rozaron os 314 Hm3, fronte a un valor medio de 718,7 Hm3, o que supón un descenso de algo máis do 56% con respecto aos valores normais.

Todos os meses do ano hidrolóxico estiveron por baixo da media, coa única excepción de decembro de 2021 que, cunhas achegas de 101,9 Hm3, situouse un 12,6% por encima da media. Destacou particularmente o comportamento dos meses de novembro (cun 72,5% menos de achegas), marzo (-66,9%), agosto (-75,8%), e sobre todo xullo, cun 87,9% menos de achegas con respecto aos valores normais.

A pesar da escasa achega, a adopción de medidas temperás permitiu que o comportamento do encoro se mantivese relativamente dentro da normalidade. Así, desde o 8 de xaneiro os desembalses limitáronse ao caudal ecolóxico, o que permitiu que a curva de encoro fose ascendendo.

Con respecto aos regadíos, realizáronse uns consumos moi moderados durante a primeira parte da campaña de rega, grazas á colaboración dos regadores, que incluíron cortes nocturnos na Canle Baixa entre o 13 de maio e o 13 de xullo, a fin de facer o posible para garantir as demandas nos meses de agosto e setembro.

Os aforros logrados permitiron proporcionar os caudais habituais durante o resto de campaña, podendo así facer fronte aos picos de demanda que se concentraron na segunda quincena de xullo e todo o mes de agosto.

Vilasouto

En Vilasouto a situación de seca foi máis grave, cunhas achegas totais de 11,95 Hm3. “Atopámonos ante o 5º peor ano de toda a serie desde 1971, só superado polos rexistros de 1988-1989 (7,86 Hm3), 1991-1992 (10,74 Hm3), 2001-2002 (10,64 Hm3) e 2016-2017 (10,47 Hm3). Con estes datos, neste ano, soamente no mes de xullo chegouse ao 45,6% de enchido” explicou o director técnico, Manuel I. Rodriguez Acebes.

A escaseza de reservas facía imposible satisfacer todas as demandas de rega, polo que se proporcionaron unicamente 3,73 Hm3 en toda a campaña, un 31,4% do que adoita ser habitual.

“Neste caso tamén se realizou unha coidadosa planificación en colaboración cos regadores, que se traduciu nun único período de rega, entre o 19 de xullo e o 15 de agosto, coincidindo coas maiores necesidades dos produtores profesionais, aos que se lles deu toda a prioridade para satisfacer no posible as súas necesidades”, concluíu o director.

Curva de explotación Encoro de Bárcena

Curva de explotación Encoro de Vilasouto

Descargar PDF