O Goberno aproba a actualización do Regulamento da Planificación Hidrolóxica

Detalles

Martes, 28 Decembro 2021

• A nova norma inclúe e mellora detalles de contido e tramitación dos plans hidrolóxicos e modifica a regulamentación dalgúns elementos crave para a revisión dos próximos plans especiais de seca
• Entre as novidades, destaca a consideración do cambio climático na planificación hidrolóxica e a harmonización dos contidos normativos nos plans de todo o territorio
• Esta reforma está enmarcada nun paquete de accións acordadas coa Comisión Europea no marco do Plan de Recuperación, Transformación e Resiliencia de España

O Consello de Ministros, a proposta do Ministerio para a Transición Ecolóxica e o Reto Demográfico (MITECO), aprobou un real decreto polo que se modifica o Regulamento da Planificación Hidrolóxica para actualizar os requisitos e procedementos que se terán en conta para os próximos plans hidrolóxicos de conca –que estiveron en consulta pública ata o pasado 22 de decembro¬– e os plans especiais de seca.

Este novo regulamento, o principal referente normativo en materia de planificación hidrolóxica, actualiza o que se aprobou en 2007 co obxectivo de axustarse ás liñas do Pacto Verde Europeo e, en xeral, ás políticas nacionais e internacionais adoptadas en materia de auga nos últimos anos.

Entre as principais novidades, a modificación do Regulamento de Planificación Hidrolóxica inclúe a regulación dos plans especiais de seca para sinalar os seus contidos mínimos esixibles e os seus procedementos de elaboración, tramitación, aprobación e revisión. Tamén destaca a consideración do cambio climático no novo ciclo de planificación hidrolóxica, a harmonización dos contidos normativos nos plans de todo o territorio e a actualización nos requisitos de publicación e notificación destes documentos á Unión Europea, adecuándose ás novas tecnoloxías da información e as comunicacións.

Despois de catorce anos de vixencia do anterior regulamento, a súa actualización supón “un salto cualitativo fundamental”, asegura a vicepresidenta Teresa Ribera. “Deste xeito integramos no corazón mesmo da planificación hidrolóxica a necesidade de adaptarnos para os efectos do cambio climático e tomar en consideración os límites ambientais”, engadiu.

O novo regulamento tamén clarifica e reforza os criterios para xustificar as exencións ao logro dos obxectivos ambientais, en especial cando se trata de promover novas modificacións das características físicas das masas de auga, e establece os programas de medidas que deberán impulsar cada unha das administracións competentes, tanto para os plans hidrolóxicos como para actuacións específicas (obras, estudos e traballos) con orzamento de investimento asociado.

Os plans hidrolóxicos de terceiro ciclo, que se aprobarán nos próximos meses, veranse beneficiados a curto prazo por esta modificación regulamentaria, xa que establece formalmente o que ata o de agora foran indicacións de coordinación ditadas desde a Dirección Xeral da auga. O novo regulamento permitirá, entre outras cousas, que a planificación hidrolóxica sexa coherente en todo o territorio español, corrixindo o problema detectado nalgúns ditames do Consello de Estado que alertaba sobre a dispersión normativa entre as distintas demarcacións.

PLAN DE RECUPERACIÓN, TRANSFORMACIÓN E RESILIENCIA

Esta modificación, que contou cun amplo proceso participativo, afecta fundamentalmente as concas intercomunitarias, pero tamén axuda á adecuada canalización dos exercicios de notificación de todos os plans hidrolóxicos de España ante a Unión Europea.

A actualización está enmarcada nun paquete de accións de reforma acordadas coa Comisión Europea dentro do compoñente 5 sobre espazo litoral e recursos hídricos do Plan de Recuperación, Transformación e Resiliencia de España.

Declaracións Teresa Ribera (mp3)

Descargar PDF