Teresa Ribeira anuncia un Plan de Transición Xusta que acompañará á futura lei de cambio climático

Detalles

Martes, 10 Xullo 2018

• A ministra para a Transición Ecolóxica destaca que as persoas teñen que estar situadas “no centro” do proceso de transición ecolóxica
• Ribera aposta por un diálogo social que abra en España “unha etapa máis xusta socialmente e máis realista ambientalmente”

A ministra para a Transición Ecolóxica, Teresa Ribera, anunciou hoxe, martes 10 de xullo, que a futura Lei de Cambio Climático e Transición Enerxética irá acompañada dun Plan de Transición Xusta. Ribera, quen inaugurou a xornada ‘Transición Enerxética e Xusta’ organizada por Comisións Obreiras (CCOO) en Madrid, considera indispensable que as persoas estean situadas “no centro” deste proceso e aposta por activar un diálogo real cos axentes sociais para abrir unha nova etapa en España, “máis xusta socialmente e máis realista ambientalmente”.

Na apertura da xornada, a ministra estivo acompañada polo secretario xeral de CCOO, Unai Sordo, e o secretario xeral da Federación de Industria do sindicato, Agustín Martín.

“As emisións de gases de efecto invernadoiro son un lastre para o noso país, para os nosos cidadáns, para as nosas actividades económicas, para os investidores e para os traballadores, tanto do presente como do futuro”, sinalou a ministra, quen resaltou a necesidade de anticipar e acompañar a todos os actores sociais neste proceso. “É a nosa obrigación facelo e só pode facerse desde a base do diálogo e da correcta ordenación das prioridades”, engadiu.

Fronte a atrasar a acción nesta materia, algo que “non axuda en nada”, a ministra resaltou as oportunidades que se abren ante un proceso de transición ecolóxica e xusta. Neste sentido, citou os últimos informes da Comisión Europea, a Organización Internacional do Traballo (OIT) ou a Organización para a Cooperación e Desenvolvemento Económicos (OCDE) e lembrou que se estima que este proceso xerará catro empregos por cada un que se perda de sectores contaminantes en 2030.

A ministra recalcou que avanzar nunha transición xusta é unha prioridade para o Goberno de España e conta coa complicidade dos ministerios de Traballo, Migracións e Seguridade Social e Industria, Comercio e Turismo, e que será imprescindible a colaboración das carteiras de Economía, Facenda e Educación. Sostén Ribera que o Plan de Transición Xusta, unido á Lei de Cambio Climático e Transición Enerxética e o Plan Integrado de Enerxía e Clima constitúen as tres principais tarefas do ministerio nos próximos meses.

Descargar PDF