Francisco Marín preside a sexta reunión do Pacto Nacional pola auga, a nivel de demarcación, cos usuarios de abastecemento

Detalles

Xoves, 26 Outubro 2017

• Nesta reunión estiveron presentes o presidente da FEGAMP e da Mancomunidade de abastecemento de auga do Bierzo, representantes de traídas de auga -COXAPO-, de varios Concellos da Demarcación e da Deputación Provincial
• O Pacto Nacional pola auga busca dar resposta aos principais retos da xestión da auga no noso país coa máxima participación, diálogo e consenso

O presidente da Confederación Hidrográfica do Miño-Sil (CHMS), organismo autónomo dependente do Ministerio de Agricultura e Pesca, Alimentación e Medio Ambiente (MAPAMA), Francisco Marín, reuniuse esta mañá cos representantes de usuarios de abastecemento continuando coa rolda de encontros previstos na Demarcación Hidrográfica para avanzar cara a un Pacto Nacional pola auga.

Neste encontro estiveron presentes o presidente da Federación Galega de Municipios e Provincias -FEGAMP-, representantes dos Concellos de Ourense, Ponferrada e Ponteareas, representante da Deputación de Ourense e varios membros da Comunidade Xeral de Augas de Galicia -COXAPO.

Desta forma, continuamos os contactos iniciados polo MAPAMA, o pasado mes de xullo, co obxectivo de involucrar no Pacto Nacional pola auga a todos os axentes implicados na xestión ou o uso da auga, para dar resposta aos principais retos, coa máxima participación, diálogo e consenso.

O Pacto Nacional pola auga debe recoller as propostas técnicas para facer un uso máis eficaz, solidario e integrado dos recursos existentes. O punto de referencia serán os temas identificados nos plans hidrolóxicos do segundo ciclo, dando continuidade a este diálogo no marco do proceso de preparación dos plans hidrolóxicos do terceiro ciclo, de acordo co calendario establecido na Directiva Marco da auga.

Este futuro Pacto centrarase en catro grandes eixos: a atención de déficits hídricos, o cumprimento dos obxectivos ambientais fixados nos Plans Hidrolóxicos -saneamento e depuración e protección de espazos emblemáticos-, a posta en marcha dos Plans de Xestión de Riscos de Inundación e outra serie de medidas en materia de gobernanza da auga -recuperación dos custos asociados aos servizos da auga e mellora da xestión e dos procedementos ordinarios-.

Este encontro é o penúltimo, a nivel de Demarcación Hidrográfica, dos sete previstos a realizar cos usuarios, asociacións e organizacións non gobernamentais (ONG); o primeiro realizouse coas empresas titulares de Aproveitamentos Hidroeléctricos, a segunda con Asociacións Ecoloxistas, a terceira con Colexios Profesionais, a cuarta con Organizacións Empresariais e o quinto con Cooperativas e Sindicatos Agrarios, quedando pendente o encontro cos Sindicatos.

Descargar PDF