Constituído o Comité de Xestión do proxecto europeo Poctep "Risc Miño-Limia" a través do que se investirá "en coñecemento" para unha mellor xestión das concas hidrográficas Miño e Limia

Detalles

Venres, 14 Xullo 2017

• O orzamento total ascende a 2.335.283 € e a achega do programa de fondos europeos será o 75% do total
• Este proxecto ten como obxectivo o deseño de medidas orientadas a mitigar os efectos dos fenómenos extremos, inundacións e secas, nesta demarcación internacional
• Formada polo presidente da CHMS, o vicerreitor do Campus de Ourense, o director da ARH Norte Norte -organismo de conca portugués- e por un representante da Universidade de Porto

O Ministerio de Agricultura e Pesca, Alimentación e Medio Ambiente, a través da Confederación Hidrográfica do Miño-Sil (CHMS), convocou, como beneficiario principal do proxecto Poctep "Risc Miño-Limia", a reunión constitutiva do Comité de Xestión como órgano de decisión, recepción e emisión da información do proxecto e do Grupo de Traballo Conxunto que coordinará a planificación, distribución e execución das accións do proxecto e que será dirixido polo director de proxecto, nomeado nesta primeira reunión a proposta do beneficiario principal.

A entidade promotora do proxecto, Confederación Hidrográfica do Miño-Sil, conta como socios coas Universidades de Vigo e de Porto e a ARH Norte, organismo de conca do norte de Portugal.

O proxecto
Este proxecto "RISC Miño-Limia", aprobado pola Unión Europea o pasado 5 de maio, ten como obxectivo o deseño dun conxunto de medidas orientadas á preparación, prevención e unha mellor xestión da demarcación hidrográfica internacional do Miño-Lima, encamiñadas a mitigar os efectos dos fenómenos extremos - inundacións ou secas-, todo iso co ánimo de mellorar na xestión dos recursos naturais tendo en conta a necesaria adaptación ao cambio climático.

Coas actuacións previstas conseguirase un maior coñecemento da demarcación hidrográfica internacional Miño-Limia, a todos os niveis e especialmente a nivel hidrográfico, e melloraranse os mecanismos de xestión existentes en relación á identificación e xestión de secas na demarcación hidrográfica internacional con metodoloxías comúns.

Por outra banda, establecerase un novo sistema de alerta temperá que permita avaliar fidedignamente o perigo e o risco real de inundación na demarcación, mediante modelos hidrometeorológicos, hidrolóxicos e hidráulicos, tanto determinísticos como probabilísticos.

E poderase coñecer a futura evolución da distribución, a longo prazo, dos recursos hídricos en cada demarcación, atendendo para o efecto do cambio climático.

Preténdese, por tanto, contribuír a un mellor coñecemento da Demarcación Hidrográfica Internacional das concas dos ríos Miño e Limia, de acordo co principio de unidade de conca e co establecido na Directiva 2000/60/CE do Parlamento Europeo e do Consello, do 23 de outubro de 2000, pola que se establece un marco comunitario de actuación no ámbito da política de augas, en relación coas demarcacións hidrográficas internacionais e os plans hidrolóxicos únicos.

Con este proxecto, cuxo orzamento ascende a 2.335.283 €, preténdese mellorar as condicións de vida de máis de 1 millon de habitantes das demarcacións internacionais dos ríos Miño e Limia.

Descargar PDF