O Goberno aproba o segundo ciclo de planificación hidrológica

Detalles

Venres, 08 Xaneiro 2016

Aprobáronse hoxe un total de 16 plans hidrológicos, incluídos todos os de competencia estatal (12) e os plans de competencia autonómica de Galicia Costa, Tinto-Odiel-Pedras, Guadalete-Barbate e Concas Mediterráneas Andaluzas

O Goberno de España aprobou nesta lexislatura dous ciclos de planificación hidrológica, cumprindo o compromiso de compasar o ritmo de planificación do noso país ao do resto dos países europeos

Os plans hidrológicos son a ferramenta fundamental para a xestión da auga, ao permitir o equilibrio entre a consecución dos obxectivos ambientais e os obxectivos de atención ás demandas

Os novos plans de conca contan cuns investimentos de máis de 17.500 millóns de euros até 2021

O Consello de Ministros, a proposta do Ministerio de Agricultura, Alimentación e Medio Ambiente, culminou hoxe o segundo ciclo de planificación hidrológica en todas as concas competencia do Estado coa aprobación, mediante Real Decreto, dos 12 plans hidrológicos de competencia estatal que afectan as demarcacións hidrográficas do Cantábrico Occidental, Cantábrico Oriental, Miño-Sil, Douro, Tajo, Guadiana, Guadalquivir, Segura, Júcar, Ebro, Ceuta e Melilla.

Os plans hidrológicos, correspondentes ao período 2016-2021, sometéronse previamente a un amplo proceso de información pública e foron informados favorablemente e por unha ampla maioría polo Consello Nacional da auga, con máis de 80% de votos a favor.

A aprobación dos plans hidrológicos do segundo ciclo vai permitir ademais ao noso país impulsar unha política da auga destinada a alcanzar un equilibrio entre a consecución dos obxectivos ambientais e os obxectivos de atención ás demandas.

Estes plans hidrológicos son necesarios para coñecer as necesidades e os recursos hídricos e establecer as medidas a adoptar para unha adecuada xestión da auga.

MÁIS DE 17.500 MILLÓNS DE EUROS DE INVESTIMENTO ATÉ 2021

Algunhas novidades dos novos plans son a  actualización do inventario de zonas protexidas; o reforzo dos programas de seguimento das masas de auga; a incorporación dun estudo sobre a recuperación do custo dos servizos da auga máis amplo; e a reorganización dos programas de medidas dos plans hidrológicos, que contemplan uns investimentos até 2021 de máis de 17.500 millóns de euros para a execución das actuacións previstas nos  programas de medidas de cada Plan.

O 65% deste investimento, aproximadamente, corresponde a medidas destinadas a cumprir os obxectivos ambientais e obxectivos de protección fronte a inundacións establecidos na normativa europea, mentres que o 35% restante englobaríase dentro das medidas previstas para a satisfacción das demandas e outros usos sectoriais relacionados coa auga.

MELLORA A PROTECCIÓN DO MEDIO AMBIENTE

Os novos plans hidrológicos contribúen decisivamente á mellora da protección do medio ambiente. Así, os ríos españois estarán en mellores condicións de conservación, contribuíndo á protección dos ecosistemas e a mellorar a calidade de vida dos cidadáns.

Así, entre outras medidas, increméntanse os caudais ecolóxicos. Tamén se priorizan as necesidades dos nosos ríos, e mellóranse a calidade das augas mediante actuacións de depuración e saneamento; e poténciase a creación de reservas fluviais.

COMPASAR A PLANIFICACIÓN ESPAÑOLA Á DO RESTO DA UE

Coa aprobación dos plans do segundo ciclo de competencia estatal, este Goberno aprobou, nesta lexislatura, dous ciclos de planificación hidrológica (o primeiro "2009-2015" e o segundo "2016-2021").

España logra así superar o atraso acumulado e cumpre o compromiso de compasar o ritmo de planificación hidrológica española ao do resto dos países europeos.

POSIBILITA O ACCESO A NOVOS FONDOS COMUNITARIOS

Isto permitiu non só que España cumprise as súas obrigacións coa Directiva Marco da auga, senón que evitou o bloqueo ao noso país dos fondos comunitarios. A aprobación dos plans hidrológicos do segundo ciclo era unha condición necesaria para o acceso aos devanditos fondos.

A aprobación dos plans, ademais, fará que o noso país poida iniciar o terceiro ciclo de planificación hidrológica xunto ao resto de socios comunitarios.

CATRO PLANS HIDROLÓGICOS MÁIS DE COMPETENCIA AUTONÓMICA

Doutra banda, o Consello de Ministros aprobou tamén hoxe outro catro plans hidrológicos intracomunitarios (de competencia autonómica), correspondentes ás concas de Galicia Costa,Tinto-Odiel-Pedras, Guadalete-Barbate e Concas Mediterráneas Andaluzas.

A este catro plans intracomunitarios súmase o Plan Hidrológico das Illas Baleares, aprobado o pasado mes de xullo, co que coa aprobación dos plans de competencia autonómica de Cataluña e de Canarias culminarase o segundo ciclo de planificación nas concas nas que a competencia recae nas Comunidades Autónomas.

Descargar PDF Descargar PPTM