O Ministerio de Agricultura, Alimentación e Medio Ambiente finaliza as obras de mellora da EDAR de Xinzo de Limia (Ourense)

Detalles

Mércores, 14 Outubro 2015

Estas actuacións, cun investimento de máis de 1,1 millóns de euros, permiten a depuración das augas residuais dunha  poboación estimada de 16.250 habitantes/equivalentes

Mellorouse a capacidade de eliminación de nutrientes para adaptarse aos parámetros de vertedura da Zona de Especial Protección para as Aves (ZEPA) na que se sitúa a instalación

O Ministerio de Agricultura, Alimentación e Medio Ambiente, a través da Confederación Hidrográfica do Miño-Sil (CHMS), finalizou as obras de mellora da Estación Depuradora de Augas Residuais (EDAR) de Xinzo de Limia (Ourense), nas que se investiron 1.139.000 euros.

O presidente do Organismo de conca, Francisco Marín, e o alcalde da localidade, Antonio Rodríguez, visitaron esta mañá a EDAR para ver in situ o resultado dos traballos, que foron financiados nun 80% polo Ministerio, a través da CHMS (que ademais executou as obras) e nun 20% pola Xunta de Galicia.

Esta actuación permitiu que a EDAR, deseñada nos anos 90, poida eliminar os nutrientes (fósforo e nitróxeno) das augas residuais, o que redundará no incremento da calidade das augas tratadas que se verten ao río Limia.

ACTUACIÓNS REALIZADAS

A EDAR, con capacidade de tratamento de 3.360 m3/día, poderá depurar as augas dunha poboación de 16.250 habitantes-equivalentes, e tamén se adaptou para que poida cumprir os parámetros de vertedura establecidos para a Zona de Especial Protección para as Aves (ZEPA) na que se sitúa a instalación, minimizando o consumo de reactivos e priorizando a eliminación de nutrientes, sobre todo o fósforo, por vía biolóxica.

Ademais, foi adaptada tecnoloxicamente para diminuír o custo enerxético, mediante a instalación de sensores, de elementos deautomatización e xestión, e de variadores de frecuencia en motores, entre outras técnicas.

Por outra banda, os traballos permitiron substituír as reixas manuais da EDAR orixinal por automáticas e as bombas de elevación por outras con rodete, resistentes á abrasión de areas, con regulación de caudal. Tamén se executou un novo desarenador xunto ao existente, mantendo o actual como apoio.

En canto ao tratamento biolóxico, implementouse un novo sistema de aireación mediante soplantes, equipados con variador de frecuencia, e grellas de difusores de burbulla fina.

Estas melloras supoñen a optimización da xestión mediante monitoraxe en continuo dos parámetros principais (amonio, fósforo e demanda química de osíxeno) e permitirán a eliminación adicional de fósforo por vía biolóxica mediante cámara anaerobia previa, aproveitando a obra civil do decantador orixinal, que estaba en desuso.

Por último, aproveitouse o edificio existente manténdose como oficina e edificio de control e adecuándoo á normativa actual, complementándoo coa construción dun novo edificio de proceso que alberga parte do tratamento biolóxico, os cadros eléctricos e o novo grupo electrógeno de emerxencia que garante o funcionamento da EDAR no caso de que se produza un corte de enerxía de rede

Descargar PDF