España e Portugal impulsan o proxecto europeo "Risc Miño-Limia" para facilitar a toma de decisións conxuntas nas concas transfronteirizas ante fenómenos extremos

Detalles

Xoves, 08 Outubro 2015

O Ministerio de Agricultura, Alimentación e Medio Ambiente, a través da Confederación Hidrográfica do Miño-Sil, asinou un protocolo de colaboración coa Axencia Portuguesa do Ambiente e as Universidades de Vigo e do Porto
Os resultados do proxecto suporán un avance cara a un plan hidrológico compartido nas concas internacionais dos ríos Miño e Limia

O Ministerio de Agricultura, Alimentación e Medio Ambiente, a través da Confederación Hidrográfica do Miño-Sil (CHMS), e a Axencia Portuguesa do Ambiente impulsaron, coa firma dun protocolo de colaboración, o proxecto de cooperación transfronteiriza ?POCTEP? ?Risc Miño-Limia?. Un plan, cuxo obxectivo é mellorar o coñecemento das concas internacionais co ánimo de minimizar os efectos ante fenómenos extremos, de intensas choivas ou secas prolongadas, avanzando con iso na intención de ambos os países de camiñar cara a un plan hidrológico compartido.

Este proxecto, no que  tamén colaborarán a Universidade de Vigo, a través do Campus da auga, e a do Porto, a través dun grupo de traballo de Hidráulica, Recursos Hídricos e Ambiente do departamento de Enxeñaría Civil,  será un complemento á experiencia técnica e profesional coa que mellorar a xestión integral dos recursos hídricos nas concas transfronteirizas.

O Ministerio de Agricultura, Alimentación e Medio Ambiente, a través do presidente da CHMS, Francisco Marín; a Axencia Portuguesa do Ambiente, a través do director da ARH Norte, José Carlos Pimenta; o reitor da Universidade de Vigo, Salustiano Matogueira; e un representante da Facultade de Enxeñaría da Universidade do Porto, Rodrigo Maia; foron as  organizacións asinantes do protocolo de colaboración durante un acto celebrado esta mañá na Subdelegación de Goberno de Ourense que estivo presidido polo subdelegado do Goberno na provincia, Roberto Castro.

O proxecto

Este proxecto "RISC Miño-Limia", que se presentará á candidatura dos POCTEP- proxectos de cooperación transfronteiriza entre España e Portugal-, ten como obxectivo a preparación das concas internacionais dos ríos Miño e Limia fronte a fenómenos extremos, así como a prevención dos mesmos, todo iso co ánimo de mellorar na xestión dos recursos naturais tendo en conta a necesaria adaptación ao cambio climático.

Preténdese, por tanto, contribuír a un mellor coñecemento da Demarcación Hidrográfica Internacional das concas dos ríos Miño e Limia, de acordo co principio de unidade de conca e co establecido na Directiva 2000/60/CE do Parlamento Europeo e do Consello, de 23 de outubro de 2000, pola que se establece un marco comunitario de actuación no ámbito da política de augas, en relación coas demarcacións hidrográficas internacionais e os plans hidrológicos únicos.

A través do proxecto RISC Miño- Limia elaborarase unha nova cartografía de toda a rede hidrográfica da demarcación e as súas concas vertentes asociadas, que será fundamental para conseguir un inventario de recursos que teña en conta o efecto do cambio climático nas partes española e portuguesa da demarcación.

Tamén se creará un novo sistema de indicadores e limiares para situacións de seca e porase en marcha un novo sistema de alerta temperá de inundacións e os seus efectos sobre a poboación, baseado en modelos hidrometeorológicos e hidráulicos de software libre, que ofrezan unha previsión continua, polo menos a 72 horas en toda a demarcación, especialmente nos tramos transfronteirizos.

"O conxunto de accións previstas permitirán avanzar na elaboración, para o ano 2021, dun plan hidrológico conxunto, único para todo o ámbito da demarcación internacional, que mellore os impactos e presións de conxunto e permítanos adiantarnos aos episodios de intensas choivas ou prolongada seca, coordinados co veciño Portugal co que compartimos a conca transfronteiriza dos ríos Miño e Limia" explicou Francisco Marín, presidente da CH de Miño-Sil.

Descargar PDF