O Ministerio de Agricultura, Alimentación e Medio construirá un novo colector na parroquia de Laias (Cenlle)

Detalles

Xoves, 26 Febreiro 2015

Ademais recuperarase a canle e as marxes e executarase unha senda de máis de 200 metros

O investimento, de 350.000 euros, será sufragado nun 80% polo Ministerio, a través da CHMS, e no 20% restante pola Deputación de Ourense e o Concello de Cenlle

O Ministerio de Agricultura, Alimentación e Medio, a través da Confederación Hidrográfica do Miño-Sil (CHMS), formalizou esta mañá o protocolo de colaboración coa Deputación Provincial de Ourense e co Concello de Cenlle para o financiamento e execución dun novo colector de saneamento en Laias, no termo municipal de Cenlle (Ourense), así como o proxecto de recuperación do regueiro de Regueiro.

A firma tivo lugar esta mañá no Centro Sociocultural San Trocado, de Laias, presidido polo delegado do Goberno en Galicia, Santiago Villanueva, e rubricado polo presidente de CHMS, Francisco Marín, polo presidente da Deputación Provincial de Ourense, José Manuel Baltar, e polo alcalde de Cenlle, Gabriel Alén.

A parroquia de Laias, situada no municipio de Cenlle, conta na actualidade cun sistema de saneamento con trazado paralelo e, en ocasións, superposto co río Miño e o regueiro Regueiro. Esta circunstancia, unida ao deficiente estado de conservación das conducións de saneamento existentes, está a provocar importantes sobrecargas do sistema de depuración da parroquia, así como filtracións que provocan contaminación por augas residuais.

COLECTOR PARA SEPARAR AS AUGAS

Para dar solución á problemática detectada, proxectouse a execución dun novo colector de saneamento de algo máis dun quilómetro de lonxitude que permita a separación total das augas residuais das pluviais.

Así mesmo, procederase a descubrir a canle do regueiro e recuperar a servidume de tránsito deste para uso público e executarase unha senda de máis de 200 metros de lonxitude para dar continuidade ao paseo existente.
O inicio destes traballos, que beneficiarán a máis de 200 habitantes/equivalentes, está previsto para o segundo semestre do ano e executarase durante catro meses.

INVESTIMENTO

O investimento previsto ascende a 350.000 euros, o 80% (280.000 euros) sufragados polo Ministerio con cargo aos fondos da CHMS, e o 20% restante polo Concello de Cenlle (50.000 euros) e pola Deputación de Ourense (20.000 euros).

O Concello de Cenlle será o encargado de poñer a disposición os terreos, bens e dereitos necesarios para a execución do proxecto de obras, as súas modificacións e posibles obras complementarias.

Descargar PDF