O Ministerio de Agricultura, Alimentación e Medio finalizou as obras de acondicionamento da canle e marxes do río Badella ao seu paso polo núcleo de Bande (Ourense)

Detalles

Mércores, 04 Febreiro 2015

O presidente da CH do Miño-Sil e o subdelegado do Goberno na provincia supervisaron o resultado dos traballos, acompañados polo alcalde da localidade e o presidente da Deputación Provincial

A recuperación ecolóxica e social do río Badella foi o obxectivo conseguido con esta actuación, conciliando os intereses socioeconómicos da zona coa conservación dos valores naturais asociados á propia canle

O investimento realizado supera os 430.000 euros, financiados integramente polo Organismo de conca

O Ministerio de Agricultura, Alimentación e Medio, a través da Confederación Hidrográfica do Miño-Sil (CHMS), finalizou as obras de acondicionamento da canle e marxes do río Badella, ao seu paso polo núcleo de Bande (Ourense), nas que o Ministerio investiu máis de 430.000 euros.

O presidente da CH do Miño-Sil, Francisco Marín e o subdelegado do Goberno na provincia, Roberto Castro, comprobaron in situ o resultado das actuacións, acompañados polo alcalde da localidade, José Antonio Armada; o presidente da Deputación de Ourense, José Manuel Baltar; e a deputada nacional, Ana Belén Vazquez.

Estas actuacións están incluídas no programa operativo de financiamento con cargo aos Fondos de Desenvolvemento Rexional (FEDER), e que contan coa participación e apoio cidadán das poboacións implicadas, co obxectivo de levar a cabo actuacións para a mellora ambiental do ámbito dos ríos.

Os traballos foron financiados nun 80% a través de fondos europeos e o 20% restante foi sufragado polo propio Organismo de conca. O Concello de Bande, pola súa banda, encargouse de poñer a disposición os terreos necesarios para a execución das obras.

"O obxectivo conseguido con esta actuación é a recuperación ecolóxica e social do río Badella, conciliando os intereses socioeconómicos da zona coa conservación dos valores naturais asociados á propia canle" matizou o subdelegado do Goberno.

PROXECTO

As actuacións comezaron coa demolición, limpeza e roza dalgúns elementos inadecuados situados na canle e marxes do río Badella, entre eles o antigo matadoiro municipal situado en leito do río.

Posteriormente procedeuse ao movemento de terras para a implantación das senllas peonís, retirando a capa vexetal, explanando, compactando a base, e finalmente estendido de zahorra artificial e pavimento, para a conseguir un corredor fluvial natural, con senllas peonís de máis de 1.2 quilómetros, abertas ao uso público, situadas á altura do antigo matadoiro municipal ata as proximidades do Pavillón de Deportes, unidas por un pontón próximo ao núcleo urbano.

Por outra parte, e para facilitar a drenaxe en episodios puntuais de avenidas extraordinarias, foi reconstruído un pontón e executados tres pequenas estruturas formadas por un ou dous vans de 3 m de luz e 1,80m de ancho remontables en momentos de intenso caudal.

En canto á restauración da canle na parcela das piscinas, tratouse de "naturalizar" o río no tramo da parcela das piscinas municipais, eliminando os elementos antrópicos que alteraron o seu perfil natural. A execución consistiu na demolición dos muros de formigón armado da condución e a estabilización dos noiros mediante a construción dun muro de sostemento tipo KRAINER formado por unha estrutura celular de madeiros de madeira, combinado coa inserción de plantas vivas.

"O proxecto xorde co obxecto de resolver o alto grao de degradación ambiental que presentaba o río Badella, potenciando a integración do río no núcleo urbano e permitindo a convivencia de ambos os dous para o desfrute de actividades de ocio no ámbito fluvial", concluíu Francisco Marín, presidente da CHMS.

Descargar PDF