O MAGRAMA investirá máis de 650 mil euros en actuacións de restauración hidrolóxico-forestal nos ríos da provincia de Lugo

Detalles

Martes, 29 Outubro 2013

Serán restaurados e acondicionados máis de 90 km de canles

Os criterios de priorización realizáronse dependendo da problemática concreta das zonas

A Confederación Hidrográfica do Miño-Sil (CHMS), Organismo autónomo dependente do Ministerio de Agricultura, Alimentación e Medio (MAGRAMA), executará actuacións de restauración hidrolóxico-forestal en varios tramos fluviais da provincia de Lugo, nas que investirá 653.696,43 euros.

Estas actuacións foron presentadas polo delegado do Goberno en Galicia, Samuel Juárez, e o presidente da Confederación Hidrográfica do Miño-Sil, Francisco Marín. Ao acto, celebrado na Subdelegación do Goberno en Lugo, asistiron tamén o subdelegado do Goberno, Ramón Carballo, e outras autoridades.

As actuacións proxectadas pretenden compatibilizar a garantía de desaugadoiro das canles fluviais fronte a avenidas ordinarias, en episodios de intensas chuvias, co mantemento dos valores ambientais existentes nos tramos a actuar.

Para a elección dos tramos susceptibles de actuación, partiuse da extensión da conca hidrográfica, 18.000 quilómetros cadrados, e utilizáronse criterios técnicos de priorización sobre os tramos fluviais con máis afección comprobada e avalada polas inspeccións da gardaría fluvial, ou a partir das peticións formuladas polos propios Concellos.

Previamente realizouse unha inspección das zonas a actuar, partindo da comprobación de se o tramo en cuestión ten algún réxime de protección ambiental, da proximidade de núcleos de poboación ou vivendas illadas ou da proximidade de infraestruturas viarias que, de producirse incidencias graves, poderían illar poboacións limítrofes. Para completar estas valoracións estudouse a tipoloxía e complexidade das actuacións a realizar, sen obviar o custo económico de cada intervención, todo iso para poder constatar a urxencia manifesta destes traballos.

O resultado deste traballo previo conclúe cunha programación clara das actuacións a realizar nas canles fluviais máis problemáticas. Estas consistirán, fundamentalmente, en rozas selectivas con eliminación de vexetación alóctona e regularización morfolóxica da canle e coa retirada de elementos obstrutivos, o que permitirá o aumento da resiliencia do río fronte a perturbacións naturais e antrópicas e á mellora da conectividade transversal e lonxitudinal das masas de auga.

Por outra parte realizarase un aumento da sección de desaugadoiro e recuperación de ribeiras mediante técnicas de bioingeniería, utilizando biorrollos de malla de coco e mantas biodegradables, estaquillado con especies vexetais e arbóreas autóctonas para tratar de evitar ou minimizar os impactos de fortes enchentes e inundacións.

"Intentaremos mellorar as zonas de risco pero sobre todo queremos garantir a seguridade para as poboacións e actividades económicas que poden verse afectadas polas alteracións hidromorfológicas dos nosos ríos", indicou Samuel Juárez, delegado do Goberno en Galicia.

"Tivemos que realizar unha valoración exhaustiva antes de programar as actuacións xa que o noso principal obxectivo é actuar nas zonas cunha problemática máis definida, co ánimo de minimizar e evitar os danos en momentos de intensas chuvias. En períodos de restricións económicas, debemos de fixar unhas prioridades" concluíu Marín, presidente da CHMS.

Descargar PDF