O alcalde do Porriño explicoulle a Marín todas as actuacións realizadas nas inmediacións do paseo do Louro, a última delas, a colocación dunha pasarela peonil paralela á ponte de Las Almendras

Durante o encontro, Santos explicou a Marín a forte aposta pola conservación e mellora do medio realizada polo Goberno local que levou á posta en marcha de diferentes actuacións, algunhas delas en execución e de gran relevancia como son o Sistema de Saneamento do río Louro e a restauración das Gándaras de Budiño. Entre os proxectos máis recentes comentados, está a colocación dunha pasarela peonil nun dos extremos do paseo do Louro, paralelo á ponte de Las Almendras do que o rexedor afirmou que "ao tratarse dun vial moi transitado por vehículos cremos necesario habilitar un paso exclusivo para os peóns e que se abrirá ao público en breve".

 

Neste conxunto de actuacións inclúese o proxecto de protección das marxes contra a erosión no río Louro, motivo da devandita visita e polo cal o rexedor local e o presidente da CHMS asinaron recentemente un Convenio de Colaboración. O obxectivo do proxecto céntrase na restauración de ambas as dúas marxes do río co fin de protexelas mediante a construción de noiros a xeito de barreira de protección para evitar futuros danos. Ademais, co fin de mellorar a integración do dique no medio fluvial, despois da súa construción, a parte superior sería cuberta con vexetación. Todo iso supón a recuperación da morfoloxía da canle alterada co paso do tempo e as fortes chuvias que causaron unha importante erosión nas marxes do río Louro, sobre todo as rexistradas en setembro de 2011.

 

Para poder velo sobre o terreo, aproveitando a visita ao Concello, o Presidente da CHMS e o Alcalde do Porriño, desprazáronse dende a Casa Consistorial á zona na que, proximamente, comezarán os traballos. Esta actuación, que abrangue dende a ponte do Valo ata a ponte de Las Almendras, comprende un tramo de aproximadamente 3 quilómetros que é continuación do paseo recentemente acondicionado, "punto de inicio dun gran proxecto cuxa proxección se centra na creación dunha gran zona verde e principal parque e área recreativa de Porriño", explica o alcalde.

 

Este proxecto supón un investimento duns 200.000 euros, cantidade cofinanciada por ambas as dúas Administracións das que a CHMS achegará un total de 120.000 € financiados a través de Fondos FEDER, asignados dentro do programa operativo Galicia.