Decembro de 2025, un mes cálido e húmido

Detalles

Venres, 09 Xaneiro 2026

• As temperaturas, en conxunto, quedaron 0.5 °C por encima da media do período de referencia, aínda que houbo contrastes en función da área xeográfica e ao longo do mes
• As precipitacións foron superiores ás normais en boa parte do oeste e sur peninsular e, especialmente, na área mediterránea

A Axencia Estatal de Meteoroloxía (AEMET), dependente do Ministerio para a Transición Ecolóxica e o Reto Demográfico (MITECO), fixo público o avance climático de decembro de 2025, que mostrou un carácter cálido en canto a temperaturas e húmido en precipitacións.

TEMPERATURAS

Decembro de 2025 tivo carácter cálido, cunha temperatura media na España peninsular de 7,2 °C, o cal supera en +0,5 °C a temperatura media do período de referencia 1991-2020; foi o decimonoveno decembro máis cálido desde o comezo da serie en 1961 e o undécimo do século XXI.

Táboa de temperaturas medias en decembro de 2025 nos distintos ámbitos xeográficos de España, anomalía con respecto ao normal e carácter.

Houbo contrastes xeográficos moi marcados: mentres que en Canarias e terzo sur da Península decembro foi frío ou moi frío, en zonas do nordeste peninsular, cordilleira Cantábrica e Baleares a temperatura foi moi cálida para a época. No resto da Península foi un mes normal ou cálido, exceptuando no extremo noroeste e algunha zona do Pirineo.

Anomalías das temperaturas medias en decembro de 2025 respecto ao período 1991-2020.

O mes de decembro comezou coa continuación do episodio frío de finais de novembro, pero ao redor dos días 4 e 5 deuse unha acusada subida de temperaturas, tanto diúrnas como nocturnas. Este episodio cálido, aínda que foi diminuíndo de intensidade, durou ata o día 20. Despois baixaron rapidamente tanto as temperaturas diarias como as nocturnas, nun episodio frío que durou ata o 28.

As temperaturas máis altas nas estacións principais rexistráronse en Canarias: Santa Cruz de Tenerife e Tenerife Sur/aeroporto alcanzaron os 25,7 °C o día 7. En dúas estacións en Canarias, Forteventura/aeroporto e Lanzarote/aeroporto, ambas o día 13, a temperatura máxima diaria foi a máis baixa desde que se teñen rexistros, destacando sobre todo o caso de Lanzarote, con 1 °C menos respecto a a anterior efeméride de decembro de 1977. En canto ás temperaturas mínimas absolutas nas estacións principais destacan os -6,7 °C de Valladolid/aeroporto o día 26 e os -6,6 ° no Porto de Navacerrada o día 21.

PRECIPITACIÓNS

Decembro tivo carácter húmido en canto a precipitacións, cun valor de precipitación media sobre a España peninsular de 80,0 mm, un 109 % do valor normal do mes (período de referencia: 1991-2020). Foi o vigesimoquinto decembro máis húmido da serie desde 1961, e o oitavo do século XXI.

Táboa de precipitacións acumuladas en decembro de 2025 nos distintos ámbitos xeográficos de España, anomalía con respecto ao normal e carácter.

O carácter da precipitación mostrou un patrón claramente contrastado entre a fachada mediterránea e amplas zonas do interior peninsular. Desde o nordés de Cataluña ata o sueste peninsular predominou un carácter moi húmido, con áreas extremadamente húmidas, especialmente no litoral catalán e valenciano. O oeste e suroeste peninsular mostraron en xeral carácter húmido, aínda que con menor intensidade que no litoral mediterráneo. En contraste, a meseta norte, gran parte de Castela-A Mancha e zonas do interior de Aragón presentaron carácter normal. Nos arquipélagos, o comportamento foi tamén diferenciado. En Baleares, predominou un carácter normal a húmido. En Canarias, o carácter foi maioritariamente húmido.

Porcentaxe da precipitación con respecto á media 1991-2020 en decembro de 2025.

As maiores precipitacións diarias rexistradas nos observatorios principais durante decembro concentráronse fundamentalmente na segunda metade do mes. Destacaron os 93,1 mm medidos en Valencia/aeroporto o día 28, seguidos dos 68,0 mm en Castelló-Almassora o día 14. En canto á precipitación total acumulada do mes entre os observatorios principais, sobresaíu Vigo/aeroporto, con 310,6 mm, seguido de Xirona/aeroporto, que acumulou 214,7 mm, e de Ceuta, con 209,4 mm.

Descargar PDF

Balance climático (PDF)