O presidente da CHMS e o alcalde de Pereiro de Aguiar visitan a nova obra de paso sobre o río Grañal, executada polo organismo de conca
- Detalles
- Martes, 20 Agosto 2024
- Con esta nova infraestrutura mellórase o acceso aos núcleos da Venda e Calvelle
- O investimento supera os 133.000 euros, financiada en porcentaxe 80% pola CHMS e o 20% restante pola Administración Local
José Antonio Quiroga, presidente da Confederación Hidrográfica do Miño-Sil (CHMS), Organismo autónomo dependente do Ministerio para a Transición Ecolóxica e o Reto Demográfico, e o alcalde de Pereiro de Aguiar, Luis Menor, supervisan as obras da nova obra de paso sobre o Río Grañal, na estrada de titularidade municipal que comunica o núcleo rural da Venda co núcleo de Calvelle.
Esta obra substitúe á infraestrutura de drenaxe existente, que presentaba un moi mal estado de conservación e que se derrubou parcialmente, interrompendo o paso pola estrada local que discorre sobre a mesma.
A nova obra construída é un pontón formado por un dintel de formigón armado de 10 metros de luz libre, executado in situ, e unha laxa superior que dispón de 6,5 metros de anchura útil. Estas novas dimensións permiten o desaugadoiro do río Grañal de acordo cos criterios establecidos no Plan Hidrolóxico da Demarcación do Miño-Sil e xeran anchura suficiente para aloxar a calzada da estrada e as súas proteccións laterais.
Os traballos completáronse coa reposición do vial superior e coa protección, augas arriba e augas abaixo, das marxes do río, recuperando así mesmo o seu leito na súa anchura completa.
Estas actuacións, que supoñen un investimento de máis de 133.000 euros, finalizaron estes días e están listas para abrir ao tráfico.
“Este é un exemplo máis de que a colaboración entre Administracións é a clave para executar proxectos importantes que melloren a calidade de vida dos veciños, neste caso concreto, melloran as comunicacións por estrada entre dous núcleos limítrofes entre si e tamén coa capitalidade municipal” explicou o presidente.
Pola súa banda, o alcalde agradeceu ao presidente a súa empatía, predisposición e présa á hora de redactar o convenio e de proceder á licitación das obras, que supoñen unhas actuacións fundamentais para os veciños afectados pola derriba da infraestrutura antiga, que motivou o corte ao tráfico da estrada de acceso, durante case dous anos.