A CHMS conmemora o Día Mundial da auga co alumnado do CEIP Infante de Borbón de Salvaterra de Miño
- Detalles
- Venres, 22 Marzo 2024
- Baixo o lema “Auga para a paz” valorízase a cooperación en materia de auga, un recurso finito e fundamental para a supervivencia
- José Antonio Quiroga celebrou este día cun grupo alumnos e alumnas participan nas actividades de educación ambiental “Gústame O Meu Río”,” deseñado pola CHMS e no que cada ano, desde 2018, participan ao redor de 300 escolares
- Proxecto que ten como obxectivo valorizar o coidado e respecto pola auga
Esta mañá os alumnos e alumnas do CEIP Infante de Borbón de Salvaterra de Miño participaron activamente no conxunto de actividades programadas pola Confederación Hidrográfica do Miño-Sil (CHMS), organismo autónomo dependente do MITECO, para conmemorar o Día Mundial da Auga.
O presidente da CHMS, José Antonio Quiroga, acudiu á carpa situada nas ribeiras do río Tea en Ponte do Cordeiro (Salvaterra de Miño) onde comprobou “in situ” o desenvolvemento das mesas de traballo, sendo testemuña do respecto que mostran as novas xeracións polo medio ambiente, o aforro de auga e o desenvolvemento sostible. Neste acto estivo acompañado pola alcaldesa desta localidade pontevedresa, Marta Valcarcel, que valorou moi positivamente estas actividades e agradeceu a elección deste centro escolar do seu Concello.
“Auga para a paz” é lema elixido por Nacións Unidas para conmemorar o Día Mundial da Auga 2024, sendo importante destacar que esta celebración anual naceu en 1993 co fin de destacar a importancia da auga doce e avogar pola xestión sostible dos recursos hídricos, co obxectivo de xerar conciencia sobre os desafíos e oportunidades asociados con este recurso vital.
Desenvolvemento das actividades
Os escolares aprenderon acerca da celebración do Día da Auga, do coidado do medio ambiente e da importancia dos pequenos xestos diarios. “Formades parte dunha nova xeración que aprende e valoriza a riqueza natural da contorna e a necesidade de conservalo”, lembroulles e agradeceulles Quiroga.
Estas actividades están enmarcadas dentro do proxecto “Gústame o Meu Río: ensíname a coidalo”, deseñado pola CHMS e no que cada ano participan ao redor de 300 escolares.
Nas distintas mesas de traballo comprobouse o estado do río Tea, a presenza de macro-invertebrados acuáticos, bosque de ribeira, vertebrados asociados ao río, calidade da auga, temperatura, ph, entre outros parámetros; ademais, reforzáronse pautas de bo uso do recurso para transmitir ás súas familias; e, por último, colocouse unha caixa niño para aves, co obxectivo de responsabilizar aos pequenos do seu coidado, protección e vixilancia nas súas visitas a este río.
“Desde a CHMS consideramos necesario que os máis pequenos comprendan que a auga e os ecosistemas fluviais son limitados e que temos que asumir a responsabilidade e o papel do ser humano na conservación dos mesmos” explicou Quiroga.
Por último, lanzou unha mensaxe ao alumnado sobre a aprendizaxe e a concienciación do uso da auga "é un recurso fundamental e escaso que debedes de coidar, porque sen auga non hai vida; isto é o que debedes de transmitir desde o voso papel de expertos coidadores de ríos" concluíu.
