O MITECO publica o primeiro informe de Transición Ecolóxica no Plan de Recuperación, Transformación e Resiliencia
- Detalles
- Xoves, 14 Decembro 2023
- O documento detalla cales son os principais ámbitos de investimento e dá conta do avance de execución destes investimentos
Con motivo da aprobación da Addenda ao Plan de Recuperación, que dota a España de 93.500 millóns de euros adicionais, o Ministerio para a Transición Ecolóxica e o Reto Demográfico (MITECO) lanza o primeiro informe para analizar como os fondos do PRTR contribúen á transición ecolóxica en tres áreas principais: biodiversidade e ecosistemas; mitigación do cambio climático e enerxía, e loita contra a contaminación e mellor xestión dos recursos.
Esta análise, de carácter transversal a todo o PRTR e a todas as compoñentes xestionadas polos distintos ministerios, detalla cales son os principais ámbitos de investimento, á vez que dá conta do avance de execución destes investimentos.
O volume de fondos programado no PRTR non ten precedentes: 163.000 millóns, dos que ao redor de 80.000 millóns son en transferencias e o resto en préstamos. Os préstamos (83.000 millóns) e 10.000 millóns das transferencias acordáronse o 17 de outubro de 2023, en forma de Addenda ao PRTR. Polo menos a metade destes fondos teñen un impacto climático e ambiental positivo.
Iso supón unha oportunidade única para avanzar na axenda de transformación ecolóxica, xa programada antes en estratexias craves como o PNIEC, PNACC ou a planificación hidrolóxica nacional.
Destaca o volume de fondos destinados á eficiencia enerxética (máis de 25.000 millóns dispoñibles, en axudas e préstamos a empresas); a mobilidade sostible (case 15.000 millóns); xeración de enerxía renovable (axudas por máis de 9.500 millóns); investigación verde, incluído o hidróxeno verde (máis de 9.000 millóns); xestión da auga (máis de 9.000 millóns), ou os case 5.000 millóns en xestión de residuos.
A Addenda ao PRTR non fai senón reforzar os principais investimentos, PERTEs cun impacto ambiental moi positivo, como o PERTE ERHA, o PERTE de Dixitalización do Ciclo da auga, o PERTE de Economía Circular ou o PERTE de Descarbonización, á vez que pon máis de 30.000 millóns en préstamos ao dispor das CCAA e das pemes para investimentos con impacto climático positivo, a través do Fondo de Resiliencia Autonómica e da Liña ICO-Verde.
Os investimentos postos en marcha desde febreiro de 2020 avanzan a bo ritmo con liñas destacables tales como os programas MOVES II e III, destinados á compra de vehículos eléctricos e híbridos enchufables, que xa convocaron máis de 1.000 millóns en axudas, os máis de 500 millóns que xa se están executando en obras de modernización de regadíos para promover o aforro da auga e enerxético, os máis de 120 millóns en subvencións para a restauración de ecosistemas e infraestrutura verde ou os máis de 1.200 millóns en axudas para autoconsumo xa convocadas.
Ademais, o informe pon en evidencia a importancia dada polo PRTR a eixos transversais que facilitan a transición ecolóxica e fana máis duradeira no tempo, como o investimento en emprego verde, en investigación e en sistemas de produción sostible.