O presidente da CHMS e o alcalde de Coles supervisan as obras de mellora do saneamento de Sequeiros nas que o Estado investirá 1,1 millóns de euros
- Detalles
- Luns, 23 Outubro 2023
- Construíuse a rede de colectores e un pozo de bombeo que conducirán as augas residuais deste núcleo cara ao saneamento de Ourense
- Está pendente a pavimentación de parte do trazado dos colectores e o alta de subministración eléctrica, estando prevista a finalización para finais de outubro
José Antonio Quiroga, presidente da Confederación Hidrográfica do Miño-Sil (CHMS), organismo autónomo dependente do Ministerio para a Transición Ecolóxica e o Reto Demográfico, e Manuel Rodríguez, alcalde de Coles, supervisaron as obras de mellora do saneamento do núcleo de Sequeiros, executadas polo organismo de conca no último ano e que supoñen un investimento de 1.100.000 euros.
Construíuse unha rede de colectores que recollen as augas residuais que chegan á fosa situada á beira do arroio Lusín, ao sur de Soutullo de Abaixo, para unidas ás procedentes do núcleo de Sequeiros e desde un novo pozo de bombeo, situado na estrada de Seoane, conducilas ata a rede de saneamento de Ourense.
Esta actuación requiriu, ademais, a realización de obras na rede de Ourense para ampliar a capacidade das conducións existentes e mellorar a conexión destas novas verteduras á EDAR.
A obra está finalizada a excepción do alta da subministración eléctrica e da pavimentación de parte do trazado dos colectores en Coles, que as choivas dos últimos días non permitiron terminar. A finalización está prevista para os últimos días de outubro.
“A colaboración entre Administracións é fundamental para conseguir un uso sostible dos recursos; neste proxecto aproveitarase o sistema de saneamento, construído nos últimos anos no Concello de Ourense e dotado de tecnoloxía punteira, para poñer fin aos problemas recorrentes de verteduras que ten o municipio de Coles, limítrofe coa capital ourensá”, concluíu Quiroga.
