A CHMS construirá un sendeiro fluvial no río Pego ao seu paso polo concello pontevedrés de Tomiño
- Detalles
- Martes, 26 Setembro 2023
- Esta mañá foi rubricado o Convenio que determina as condicións de colaboración entre ambas as partes para o financiamento e execución das obras
- O investimento total necesario estimouse en 1.530.000€, sufragados en porcentaxe 80% polo organismo de conca e o 20% restante polo municipio
José Antonio Quiroga, presidente da Confederación Hidrográfica do Miño-Sil (CHMS), Organismo autónomo dependente do Ministerio para a Transición Ecolóxica e o Reto Demográfico, e Sandra González, alcaldesa do Concello pontevedrés de Tomiño, rubricaron o Convenio de colaboración que posibilita a construción dunha senda fluvial paralela ao río Pego que conecte o núcleo principal de poboación co sendeiro existente no Miño.
Este documento establece as condicións de colaboración para o financiamento e execución das obras e o réxime de entrega das actuacións executadas para o mantemento e conservación pola administración local.
Proxecto
As obras proxectadas consisten na construción dun sendeiro fluvial, sensiblemente paralelo ao río Pego, entre a poboación de Tomiño e a estrada PO-552; e nas actuacións necesarias para dar solución á problemática de saneamento do colector do río Pego que discorre por Dominio Público Hidráulico e que neste momento atópase en moi mal estado de conservación, recibindo achegas de auga limpa procedente do río o que dificulta a depuración.
O investimento total necesario estimouse en 1.530.000€, que serán sufragadas en porcentaxe 80% pola CHMS e o 20% restante polo Concello de Tomiño.
