A CHMS construirá unha senda fluvial no río Sampil ao seu paso polo concello ourensán de Celanova
- Detalles
- Venres, 22 Setembro 2023
- Esta mañá foi rubricado o Convenio que determina as condicións de colaboración entre ambas as partes para o financiamento e execución das obras
- O investimento necesario estímase en 828.000 euros
José Antonio Quiroga, presidente da Confederación Hidrográfica do Miño-Sil (CHMS), Organismo autónomo dependente do Ministerio para a Transición Ecolóxica e o Reto Demográfico, e Antonio Puga, alcalde do Concello ourensán de Celanova, rubricaron o Convenio de colaboración que posibilita a construción dunha senda fluvial no río Sampil.
Este documento establece as condicións de colaboración para o financiamento e execución das obras e o réxime de entrega das actuacións executadas para o mantemento e conservación pola administración local.
Proxecto
Construirase un paseo fluvial polas marxes do río Sampil partindo do Areal -na contorna das piscinas municipais- e rematando próximo ao núcleo de Mourillós; na zona de expansión do centro urbano de Celanova.
O tramo de actuación ten unha lonxitude aproximada duns 1.320 metros lineais, iniciando o seu percorrido pola marxe esquerda do leito, alternándose o seu trazado por unha marxe ou outra en función das características e dispoñibilidade do terreo e rematarase, tamén pola marxe esquerda, no camiño de servizo da estrada de ligazón coa autovía AG-31.
O investimento total necesario para a actuación estimouse en 828.000 €, que será financiado en porcentaxe 78,27% e 21,73% entre a CHMS e o Concello, respectivamente.
