A CHMS mellorará a contorna, a accesibilidade e o patrimonio etnográfico do rio Caselas no municipio pontevedrés de Tui
- Detalles
- Luns, 31 Xullo 2023
- “Este organismo colabora cos concellos na recuperación do patrimonio natural e etnográfico presente na demarcación co ánimo de poñer en valor os ríos e a súa contorna para o uso e goce da cidadanía” explicou Quiroga
- Procederase á restauración e posta en valor dos muíños Do Medio, en O Souto de Arriba, e do Muiño da Seña
- Executarase unha senda peonil paralela ao río Caselas, pola súa marxe dereita, ao longo do municipio
José Antonio Quiroga, presidente da Confederación Hidrográfica do Miño-Sil (CHMS), Organismo autónomo dependente do Ministerio para a Transición Ecolóxica e o Reto Demográfico, acorda co Concello de Tui as actuacións de mellora da contorna, da accesibilidade e do patrimonio etnográfico do rio Caselas no municipio pontevedrés de Tui, nas que se investirán máis de 935.000 euros, cofinanciado entre ambas as Administracións en porcentaxe 80% CHMS e o 20% restante polo Concello de Tui.
O proxecto
Procederase á execución dunha senda peonil paralela ao río Caselas pola súa marxe dereita, ao longo do termo municipal de Tui, para mellorar a accesibilidade e recuperar ambientalmente a contorna.
Por outra banda, as obras de restauración e posta en valor dos muíños consistirán no acondicionamento das estruturas do Muiño do Medio en O Souto de Arriba e do Muiño da Seña. Para iso, realizaranse actuacións de limpeza, estabilización e consolidación de paramentos e cubertas, así como o acondicionamento das zonas exteriores e creación de elementos de interpretación e posta en valor deste patrimonio. Por outra banda, na contorna do antigo acueduto crearanse elementos de interpretación e posta en valor da infraestrutura.
“Este organismo colabora cos concellos na recuperación do patrimonio natural e etnográfico presente na demarcación co ánimo de poñer en valor os ríos e a súa contorna para o uso e goce da cidadanía” explicou Quiroga
“Queremos agradecer desde o Concello de Tui a predisposición da CHMS en prestar apoio aos concellos que solicitamos actuacións de mellora de espazos de lecer e saúde moi demandados por veciños e visitantes e que, ademais, contribúen a valorizar e a conservar a riqueza fluvial e o patrimonio etnográfico da zona” engadiu Ana María Núñez, Tenente de alcalde de Tui.