A CHMS acorda coa USC a cesión do Muiño de Olga como punto de divulgación científica
- Detalles
- Luns, 31 Xullo 2023
- A CHMS executará as obras de adaptación das instalacións actuais, actuacións nas que investirá preto de 900.000 euros
- A USC dará un uso divulgativo a esta instalación para dedicalo principalmente a temas relacionados coa hidroloxía, xestión de recursos do río, ecosistemas fluviais ou etnografía
- “Establécese o marco de colaboración que permite dotar de contido ao Muiño de Olga, valorizando ríos e as infraestruturas fluviais tradicionais presentes, sobre todo, na parte lucense da demarcación do Miño-Sil” explicou Quiroga
José Antonio Quiroga, presidente da Confederación Hidrográfica do Miño-Sil (CHMS), Organismo autónomo dependente do Ministerio para a Transición Ecolóxica e o Reto Demográfico, e Antonio López, reitor da Universidade de Santiago de Compostela, rubrican o acordo que posibilite a cesión do uso do “Muiño de Olga”, propiedade da CHMS, en favor da USC, co interese de poñer en valor e potenciar o coñecemento dos ríos e das infraestruturas hidráulicas asociadas á auga desde a antigüidade. Neste acto, realizado nas instalacións do muíño, estiveron acompañados polo tenente de alcalde do Concello de Lugo, Miguel Fernández.
A CHMS executará as obras necesarias para conseguir a adecuada finalidade do edificio, eliminando os feísmos desta contorna tan privilexiada ao bordo do río Miño, á beira da Acea de Olga e situado nun municipio tan arraigado á historia e ao patrimonio fluvial.
Pola súa banda, a USC dotará de contido esta infraestrutura para o seu uso como punto de divulgación científica e de transferencia de coñecemento. “Hai que lembrar que as Universidades teñen entre as súas funcións, a difusión, a valorización e a transferencia do coñecemento ao servizo da cultura, da calidade de vida e do desenvolvemento económico e social, polo que consideramos que esta cesión terá un uso adecuado de difusión da cultura tradicional, da historia e do valioso patrimonio etnográfica co que conta a nosa Comunidade Autónoma” incidiu o presidente.
“Establécese o marco de colaboración que permite dotar de contido ao Muiño de Olga, valorizando ríos e as infraestruturas fluviais tradicionais presentes, sobre todo, na parte lucense da demarcación do Miño-Sil” explicou Quiroga
“O acordo contén o compromiso de destinar a devandita instalación a actividades de divulgación dos equipos docentes e grupos de investigación vinculados sobre todo ao Campus Terra da USC, especialmente os dedicados a hidroloxía, xestión dos recursos fluviais, flora e fauna acuáticas, construcións tradicionais ou etnografía” engadiu o reitor.
O proxecto construtivo contempla, ademais da rehabilitación do Muiño de Olga, a demolición de elementos anexos e a adecuación da contorna para evitar o impacto paisaxístico. Por outra banda, unha vez asinado este acordo e como apéndice ao proxecto, as partes reuniranse para deseñar as características e peculiaridades que o adecuen ás necesidades da Universidade, para ser incorporadas ao proxecto orixe e proceder á súa licitación.
O investimento estimado do proxecto construtivo ascende a 900.000 €, que serán sufragados pola CHMS na súa totalidade.
