A CHMS adxudica as obras de prolongación da senda do río Badella ao seu paso polo municipio ourensán de Bande
- Detalles
- Mércores, 26 Xullo 2023
- Construirase un sendeiro de 800 metros e procederase á limpeza de leito e marxes
- O investimento estimado superará os 275.000 €, que serán sufragados nun 80% pola CHMS e o 20% restante pola Deputación Provincial de Ourense
José Antonio Quiroga, presidente da Confederación Hidrográfica do Miño-Sil (CHMS), Organismo autónomo dependente do Ministerio para a Transición Ecolóxica e o Reto Demográfico, adxudica as obras de prolongación da senda do río Badella ao seu paso polo municipio ourensán de Bande á empresa Obras Gallaecia, S.L. por importe de 275.000 euros.
SITUACION ACTUAL
O río Badella, tamén coñecido como río Corga, presenta un alto grao de degradación ambiental ao seu paso polo núcleo urbano de Bande (Ourense), froito do crecemento urbano pouco sostible do núcleo principal.
Para resolver esta situación de degradación do dominio público hidráulico e a súa contorna, no ano 2012 este organismo de conca executou unha serie de actuacións para que recuperasen este espazo natural. A eficacia da actuación citada levou á toma en consideración da prolongación do acondicionamento do devandito espazo fluvial, co obxecto de continuar a recuperación do mesmo para uso e goce dos cidadáns/as.
O novo proxecto
En aras da colaboración entre Administracións, a CHMS cofinanciará e executará a prolongación do sendeiro fluvial, nunha lonxitude aproximada de 800 metros, así como na limpeza do río e tratamento silvícola da vexetación de ribeira.
Estas actuacións, que requiren dun investimento de máis de 275.000 €, serán sufragados nun 80% pola CHMS, o 20% restante pola Deputación Provincial de Ourense. “Desde este organismo de conca consideramos que a colaboración institucional é clave para executar proxectos que respecten, valoricen e melloren o medio ambiente e a calidade das augas dos nosos leitos” explicou Quiroga
“Os cidadáns teñen o dereito de gozar da riqueza ambiental presente na demarcación do Miño-Sil e, para iso, as distintas Administracións temos o deber de valorizar e de potenciar o atractivo dos distintos municipios, pero sen obviar a normativa que implica un desenvolvemento máis sostible” concluíu o presidente.