O IDAE abre un portal web específico con información práctica e accesible sobre as súas liñas de axudas do PRTR
- Detalles
- Mércores, 21 Xuño 2023
- Pretende facilitar ós cidadáns, sectores profesionais e empresas o coñecemento dos incentivos ao despregamento de enerxías renovables e ás actuacións en materia de eficiencia e aforro enerxético
- Complementará a información pública que xa ofrece de forma exhaustiva a web institucional do IDAE
O Instituto para a Diversificación e o Aforro da Enerxía (IDAE), organismo adscrito ao Ministerio para a Transición Ecolóxica e o Reto Demográfico (MITECO), pon en marcha un novo portal web, dispoñible aquí, no que presenta de forma sintética e próxima os distintos programas de axudas do Plan de Recuperación, Transformación e Resiliencia (PRTR) que xestiona para o despregamento das enerxías renovables en todo o seu abanico de tecnoloxías e a súa integración no sistema eléctrico, así como para reforzar as políticas de eficiencia e aforro enerxético.
Esta nova xanela de comunicación pretende, mediante o uso dunha linguaxe declinada a pé de rúa, facilitar información dunha forma resumida e intuitiva sobre as diferentes liñas de incentivos do PRTR xestionados polo IDAE –nalgúns casos xunto ás CCAA–, complementando, sen substituír, a que ofrece de maneira exhaustiva sobre estas mesmas subvencións na súa web institucional.
Trátase, en suma, de abrir un leito máis sinxelo e amigable para todos os públicos e sectores potencialmente interesados nesas liñas de incentivos, de uso extremadamente simple en calquera dispositivo (computador, tableta ou teléfono móbil), dando unha nova visibilidade e maior proximidade ao cidadán.
Na actualidade, o IDAE xestiona convocatorias de axudas aprobadas polo MITECO por valor superior aos 8.000 millóns do PRTR, o 81% dos fondos previstos no ámbito de actuación do instituto. Este volume orzamentario e a complexidade intrínseca deste tipo de programas, xunto ao carácter prioritario e transversal das políticas de impulso á transición enerxética, a axenda verde e a loita contra o cambio climático, obrigan a un esforzo extra en divulgación para achegar estes fondos aos cidadáns e a numerosos sectores profesionais e empresas dunha forma sinxela, clara e comprensible.
O PRTR
O Plan de Recuperación, Transformación e Resiliencia de España, aprobado pola Comisión Europea o 16 de xuño de 2021, representa un esquema coherente de investimentos a realizar na súa práctica totalidade entre 2021 e 2023 e nun ambicioso programa de reformas estruturais e lexislativas orientadas a abordar os principais retos do noso país.
O PRTR guía a execución de 72.000 millóns de euros de fondos europeos ata 2023 e mobiliza o 50% dos recursos cos que conta España grazas ao instrumento Next Generation EU, orientando a modernización da economía española, a recuperación do crecemento económico e a creación de emprego, a reconstrución sólida, inclusiva e resiliente tras a crise da COVID, dando resposta a desafíos transcendentais da próxima década como a transformación do noso sistema económico con parámetros de sustentabilidade, descarbonización e adaptación fronte ao cambio climático.