A CHMS executará actuacións de adecuación e mellora de 4 fosas sépticas no municipio ourensán de Melón
- Detalles
- Venres, 23 Decembro 2022
- O investimento necesario estímase en 327.300 euros, que serán sufragados en porcentaxe 80/20, entre CHMS e Concello, respectivamente.
José Antonio Quiroga, presidente da Confederación Hidrográfica do Miño-Sil (CHMS), Organismo autónomo dependente do Ministerio para a Transición Ecolóxica e o Reto Demográfico, e Emilio Luís Diaz, alcalde do Concello ourensán de Melón, rubricaron o Convenio de colaboración que posibilitará melloras no sistema de saneamento e depuración do municipio.
O presente convenio ten por obxecto determinar as condicións de colaboración entre ambas as partes para o financiamento e execución das obras; así mesmo, tamén establece o réxime da posterior entrega das obras executadas para o seu mantemento e conservación.
Proxecto
Actualmente, os núcleos de Melón, Quins e Barcia, no termo municipal de Melón, contan con sistemas de depuración a través de fosas sépticas, cuxo funcionamento está a resultar ineficaz e deficiente; así mesmo, a rede de colectores municipais nalgún destes núcleos necesitará dalgún tipo de intervención de limpeza, mellora ou reconstrución.
Para solucionar a problemática existente, procederase, en primeiro lugar, á realización dun estudo para a análise do estado e funcionamento actual de cada unha das fosas sépticas existentes, que permitirá definir as obras necesarias para a súa posta a punto, e o deseño dunha nova instalación de depuración para o núcleo de Quins; en segundo lugar, á execución das correspondentes obras derivadas do estudo.
O investimento necesario estímase en 327.300 €, que serán sufragados en porcentaxe 80/20 pola CHMS e o Concello de Melón, respectivamente.