A CHMS investirá máis de 700.000 euros en mellorar o saneamento e a depuración do municipio ourensán de Taboadela
- Detalles
- Martes, 21 Setembro 2021
- Actualmente os nucleos de Espiñeiro, Xociños, Vendanova, Veredo, Alto de Taboadela e Palacios non dispoñen do sistema adecuado, o que provoca verteduras recorrentes ao leito
José Antonio Quiroga, presidente da Confederación Hidrográfica do Miño-Sil (CHMS), Organismo autónomo dependente do Ministerio para a Transición Ecolóxica e o Reto Demográfico, e Alvaro Vila, alcalde de Taboadela, rubricaron hoxe o Protocolo de colaboración a través do que se adquire o compromiso para o financiamento, execución e entrega das distintas actuacións que mellorarán o saneamento e a depuración do municipio ourensán de Taboadela.
“Na actualidade, os núcleos rurais de Espiñeiro, Xociños, Vendanova, Veredo, Alto de Taboadela e Palacios, non dispoñen dun sistema de depuración de augas residuais adecuado, o que motiva este proxecto e supón unha nova aposta polo medio ambiente e o desenvolvemento dun rural sostible” explicou o presidente.
“A través do presente protocolo, formalizamos o compromiso do Goberno de España na mellora do saneamento e depuración de augas residuais do municipio de Taboadela, realizando un investimento de 700.000 €.”, concluíu Quiroga.