A CHMS continúa os traballos de conservación do río Sil ao seu paso pola localidade leonesa de Villablino
- Detalles
- Mércores, 21 Abril 2021
- Esta semana unha brigada forestal, composta por 5 operarios, ultima os traballos de limpeza dun tramo que abarca máis de 350 m. de leito
- O investimento estimado supera os 12.000 €
A Confederación Hidrográfica do Miño-Sil (CHMS), Organismo autónomo dependente do Ministerio para a Transición Ecolóxica e o Reto Demográfico, continúa traballando na limpeza de leitos e marxes dos ríos de León. Esta semana unha brigada forestal, composta por 5 operarios, traballa no río Sil ao seu paso polo municipio leonés de Villablino.
As actuacións en curso consisten na execución de rozas selectivas de matogueira perimetral, poda e clareo de ramas baixas e curta sanitaria de pés secos para evitar tapóns en infraestruturas de paso, ademais de tratamento selvícola e vexetación de ribeira. Por outra banda, está a procederse á eliminación de casetas ou galpóns de chapa abandonados e arruinados en zona de dominio público hidráulico.
A lonxitude do tramo de actuación comprende máis de 350 metros, en zona rural; e o investimento estimado das obras é de 12.000 €.
