A CHMS continúa os traballos de conservación e mellora dos ríos da provincia de León
- Detalles
- Venres, 09 Abril 2021
- Actuacións incluídas na conservación dos ríos da Demarcación Miño-Sil para 2021, nos que o Goberno de España investirá máis de 3.900.000 €
- Nesta semana dúas brigadas forestais realizaron traballos no municipio leonés de Camponaraya, nos arroios Gargalón e Barredos, ao seu paso polas localidades de Valgoma e Camponaraya, respectivamente
- A próxima semana traballarase no arroio Magaz, ao seu paso por Magaz de Abaixo (Camponaraya), e no río Sil en Villablino
A Confederación Hidrográfica do Miño-Sil (CHMS), Organismo autónomo dependente do Ministerio para a Transición Ecolóxica e o Reto Demográfico, continúa traballando na limpeza de leitos e marxes dos ríos de León. Estas actuacións están incluídas na conservación do Dominio Público Hidráulico (DPH) dos ríos da Demarcación Miño-Sil para 2021, nos que o Goberno de España investirá máis de 3,9 millóns de euros.
Esta semana dúas brigadas forestais, compostas por 5 operarios cada unha, realizaron traballos no municipio leonés de Camponaraya, no arroio Gargalón (localidade de Valgoma) e no arroio Barredos, ao seu paso por Camponaraya.
O vindeiro luns, 12 de abril, está previsto o inicio dunha nova actuación neste concello, no arroio Magaz, ao seu paso por Magaz de Abaixo; e a segunda brigada traballará no río Sil ao seu paso polo municipio de Villablino.
Actuacións
No arroio Gargalón a lonxitude do tramo de leito xa executado comprende aproximadamente 700 metros, en zona rural. Da inspección previa realizada observouse gran acumulación de vexetación de ribeira que dificultaba o normal discorrer da corrente e que podería provocar desbordamentos en época de avenidas.
Para evitalo realizáronse rozas selectivas de matogueira perimetral, poda e clareo de ramas baixas e curta sanitaria de pés secos para evitar tapóns, eliminación e trituración dos restos, así como, a aplicación de tratamentos selvícolas en vexetación de ribeira. O investimento realizado supera os 7.500 euros.
No arroio Barredos, o tramo obxecto da actuación é de aproximadamente 1600 metros, en zona rural. A actuación consistiu na realización de tratamentos selvícolas en vexetación de ribeira, apeo, partido e saca de arboledo con potencial risco de crear tapón no leito e roza da vexetación arbustiva presente no leito e marxes.
Estes traballos executáronse con apoio de maquinaria con autocargador forestal para saca de madeira e un tractor con rozadora para a eliminación da vexetación arbustiva e o triturado de restos de curta.
Quedaría pendente a retirada de acarreos con retroexcavadora ata despois do 1 de maio, por indicación do Servizo Territorial de Medio Ambiente da Junta de Castilla y León, para evitar danos na freza.
O investimento no arroio Barredos superará os 25.500 euros.
