A Confederación do Miño-Sil traballa no río Rato ao seu paso polo núcleo urbano de Lugo
- Detalles
- Mércores, 13 Marzo 2019
- A actuación consiste na roza selectiva de vexetación, podas selectivas, retirada de árbores secas e eliminación de residuos sólidos urbanos
- O tramo de actuación abarca 1,7 km de leito, desde As Termas ata a rotonda de Paradai
A Confederación Hidrográfica do Miño-Sil ( CHMS), Organismo autónomo dependente do Ministerio para a Transición Ecolóxica, iniciou hoxe os traballos de limpeza do río Rato ao seu paso pola zona urbana de Lugo. Estas actuacións están incluídas no contrato de conservación do Dominio Público Hidráulico ( DPH) dos ríos da Demarcación Miño-Sil na provincia de Lugo.
A zona de actuación comeza nas proximidades ao centro comercial As Termas e finaliza a 1,7 km augas abaixo do devandito punto, concretamente na ponte de Paradai.
ACTUACIÓNS
Da inspección previa detectouse que na parte inicial do tramo, dada a proximidade ao centro comercial, observouse abundancia de residuos sólidos no leito, en canto á parte final que limita con numerosas e pequenas hortas particulares e de difícil acceso para maquinaria pesada, presenta abundante matogueira leñosa, silvas, arbustos e árbores que invaden o curso fluvial, obstaculizando o libre discorrer das augas, o que podería provocar a inundación das propiedades en momentos de intenso caudal.
Para solucionar a problemática existente, procederase á roza selectiva de matogueira perimetral, poda e clareo de ramas baixas, á curta sanitaria de pés secos para evitar tapóns e á retirada de residuos sólidos urbanos.
O prazo de execución estímase en 3 semanas que discorrerán ao longo dos meses de marzo e abril.
