A Confederación Hidrográfica do Miño-Sil intensifica os traballos de restauración hidrolóxico-forestal no río Barbaña, ao seu paso pola capital ourensana
- Detalles
- Xoves, 05 Xuño 2014
Coincidindo co Día Mundial do Medio, o subdelegado do Goberno en Ourense e o presidente da CHMS visitan a zona de actuación para supervisar "in situ" os traballos
Unha brigada composta por 8 operarios traballará, durante 3 meses, en máis de sete quilómetros de canle
O investimento previsto, para actuacións no río Barbaña e os seus afluentes, supera os 90.000 euros
A Confederación Hidrográfica do Miño-Sil (CHMS), Organismo autónomo dependente do Ministerio de Agricultura, Alimentación e Medio (MAGRAMA), traballa na restauración hidrolóxico-forestal do río Barbaña, ao seu paso pola cidade de Ourense.
Esta mesma mañá, coincidindo co Día Mundial do Medio, o subdelegado do Goberno en Ourense, Roberto Castro, e o presidente da CH do Miño-Sil, Francisco Marín, supervisaron a boa marcha dos traballos, iniciados o pasado 26 de maio.
Actuacións previstas
Na inspección previa realizada comprobouse unha importante presenza de vexetación arbustiva, exceso de matogueira e maleza acumulada, ademais de árbores secas, caídas no leito do río. Por outra parte, observouse unha importante presenza de residuos sólidos urbanos, na zona máis próxima á zona urbana, e bolsas e cartóns xerados posiblemente polo mercado que, dúas veces ao mes, se instala na zona da praza de abastos.
A programación dos traballos realizouse atendendo á problemática concreta da zona e para iso estanse a realizar tratamentos silvícolas, mediante rozas puntuais da vexetación existente eliminando o exceso de matogueira e a maleza acumulada nalgunhas zonas, co obxectivo principal de mellorar a capacidade de desaugadoiro e de acondicionar a banda de vexetación, tanto en densidade coma en estrutura.
Programáronse, ademais, podas selectivas sobre o estrato arbóreo, apeando os pés claramente dominados ou decrépitos e respectando en todo momento as especies arbustivas autóctonas e procederase á retirada manual ou mecanizada de árbores caídas e susceptibles de caer ao leito do río, que puidesen obstruír a canle e provocar desbordamentos ou erosión dos noiros.
Os restos de vexetación retirados, serán triturados "in situ", salvo os máis grosos que se ofrecerán aos veciños para uso doméstico ou, no seu caso, serán transportados a un vertedoiro autorizado, a retirada dos residuos que poidan estar acumulados en ambas as dúas marxes, entullos, residuos sólidos urbanos e ferralla, entre outros, serán separados pola súa natureza e transportaranse a xestor autorizado
O obxectivo, polo tanto, é mellorar a estrutura da vexetación de ribeira e a continuidade lonxitudinal da canle para recuperar a sección de evacuación orixinal deste, co ánimo de minorar ou eliminar os efectos nas infraestruturas e terreos lindantes durante as inundacións por avenidas extraordinarias.
Estas actuacións, cuxa duración se estima en 3 meses, son realizadas por unha brigada composta por unha cuadrilla forestal de 8 operarios (1 capataz forestal e 7 peóns especialistas), que realizasen o seu labor fundamentalmente por medios manuais e coa maquinaria axeitada, compatible coa zona de actuación.
A lonxitude do tramo de actuación abrangue 7 quilómetros de canle e o investimento previsto supera os 90.000 euros.