Técnicos da CHMS explican o funcionamento e a operatividade do Centro de Control de Cuenca (CECU) aos alumnos da Universidade de Vigo
- Detalles
- Xoves, 08 Maio 2014
Puideron comprobar "in situ" a recepción dos datos en tempo real e os valores das diferentes variables hidrometeorológicas e de calidade das augas
Visitaron tamén a estación de control, na marxe esquerda do Miño en Ourense, dende onde se rexistran os datos de caudal, nivel, temperatura e os distintos parámetros de calidade das augas que se analizan en continuo
A Confederación Hidrográfica do Miño-Sil (CHMS), organismo autónomo dependente do Ministerio de Agricultura, Alimentación e Medio (MAGRAMA), recibiu esta mañá a unha vintena de alumnos da Escola Técnica Superior de Enxeñeiros Industriais da Universidade de Vigo que están a realizar o Máster en "Contaminación industrial: avaliación, prevención e control".
A xornada iniciouse ás 10,00 da mañá nas aulas da Facultade de Ciencias do Campus de Ourense, onde técnicos da Confederación Hidrográfica do Miño-Sil impartiron clase sobre a Directiva Marco da Auga, a delimitación e clasificación das masas de augas, a avaliación do seu estado a través dos distintos indicadores utilizados, así como acerca das Redes de Control do Estado das Masas de Auga (REDE CEMA) empregadas para iso, tanto manuais coma automáticas.
Posteriormente, os estudantes acudiron ao Centro de Control de conca (CECU) da Confederación Hidrográfica, na avenida da Habana da capital ourensana, e á estación de control do Sistema Automático de Información Hidrolóxica e de Calidade das Augas (SAIH-SAICA), situada na marxe de esquerda do río Miño, augas abaixo do encoro de Velle.
No CECU os alumnos puideron comprobar o funcionamento e a operatividade da infraestrutura onde se reciben, vía satélite, en tempo real e cunha frecuencia cincominutal, os valores das diferentes variables hidrometeorológicas e de calidade das augas medidas polas estacións de control dos sistemas automáticos SAIH e SAICA.
Na visita á estación de control do río Miño en Ourense, os alumnos puideron comprobar "in situ" como nesta instalación se rexistran os datos de caudal, nivel, temperatura, radiación velocidade de vento, etc., ademais dos distintos parámetros de calidade das augas, analizados en continuo polas diferentes sondas e analizadores automáticos,como pH, condutividade, amonio, temperatura da auga, turbidez e o osíxeno disolto, datos que son enviados en tempo real ao CECU.
XESTIÓN DAS INUNDACIÓNS
Por outra parte mostrouse aos universitarios como se xestionan os distintos períodos de inundacións que se producen nos 17.600 km2 que aproximadamente abrangue o territorio da Demarcación, e como se alerta aos distintos organismos competentes en materia de seguridade e Protección Civil. Como caso práctico, ademais, estudouse un eventual episodio de contaminación accidental producido nas masas de auga o pasado ano.