O MAGRAMA investirá máis de 400.000 euros en paliar os efectos dos últimos temporais no Dominio Público Hidráulico na provincia de Pontevedra
- Detalles
- Xoves, 20 Marzo 2014
Melloraranse os tramos máis sensibles dos ríos Tamuxe, Louro e Miño, para corrixir os danos ocasionados e minimizar os efectos adversos de futuras avenidas
O Consello de Ministros autorizou ao MAGRAMA un investimento extraordinario de 44 millóns de euros para adoptar as medidas necesarias para paliar os efectos dos 25 temporais de vento e chuvia acontecidos entre finais de 2013 e febreiro de 2014
O Ministerio de Agricultura, Alimentación e Medio (MAGRAMA) investirá máis de 400.000 euros para paliar os efectos causados polos temporais no Dominio Público Hidráulico das canles da provincia de Pontevedra.
Así anunciouno esta mañá o delegado do Goberno en Galicia, Samuel Juárez, durante o acto de presentación das actuacións a acometer, no que estivo acompañado polo presidente da Confederación Hidrográfica do Miño-Sil, Francisco Marín, e polo subdelegado do Goberno en Pontevedra, Antonio Coello.
O delegado do Goberno detallou as distintas intervencións que executará o Ministerio a través da Confederación Hidrográfica do Miño-Sil (CHMS), organismo autónomo do MAGRAMA, para reparar os danos que ocasionaron os 25 temporais de intensas chuvias acontecidos entre o 15 de decembro de 2013 e o 15 de febreiro deste ano, no que se rexistraron o 56% das precipitacións que corresponderían a un ano hidrolóxico normal.
Samuel Juárez anunciou que, no ámbito da provincia de Pontevedra, se executarán distintas actuacións agrupadas en tres grandes bloques.
RÍO MIÑO E AFLUENTES
Entre as actuacións a executar nun primeiro bloque, a CHMS levará a cabo a reparación dos danos ocasionados nas marxes do río Miño e os seus afluentes, ademais de mellorar a súa capacidade de desaugadoiro para evitar futuras inundacións e avenidas, para o que se investirán 200.000 euros.
As actuacións concretas consistirán na mellora da capacidade de desaugadoiro mediante labores de eliminación dos tapóns e árbores caídas para evitar que poidan ser arrastrados pola auga noutros momentos de intenso caudal. Por outra parte, procederase á restauración das marxes erosionadas, mediante técnicas de bioingeniería, e á reconstrución dos diques danados polos últimos temporais.
RÍO TAMUXE
Nun segundo bloque previuse a reparación dos danos ocasionados e a estabilización das marxes dos ríos mediante técnicas de bioingeniería. Procederase tamén á retirada de tapóns e a curta e roza da vexetación que puidese ocasionar arrastres e provocar danos nas infraestruturas de paso. Estas actuacións supoñerán un investimento de 100.000 euros.
RÍO LOURO
No terceiro bloque realizaranse actuacións en ambas as dúas marxes do río Louro, moi erosionadas polo intenso caudal recollido. Trátase concretamente da restauración do danado e de frear o grave proceso de erosión de ambas as dúas marxes co interese de evitar inundacións e avenidas.
Para iso, procederase á construción de diques de protección por métodos tradicionais e con tratamentos de bioingeniería que doten de estabilidade á canle. Por último, recuperarase o paseo peonil, de aproximadamente 250 metros, que se viu gravemente danado polos últimos temporais de chuvia e vento. No conxunto de actuacións prevista para o río Louro supón un investimento de 200.000 euros.
MEDIDAS ADOPTADAS POLO GOBERNO
O Consello de Ministros aprobou o pasado 21 de febreiro, por Real Decreto Lei 2/2014, a adopción de medidas urxentes para reparar os danos causados polas tormentas de vento e mar na fachada atlántica e a costa cantábrica, cun presuposto de preto de 44 millóns de euros.